Тошкент МДҲнинг йирик контент марказларидан бири бўлишга тайёрланмоқда

Бугун Ўзбекистонда илк бор ўтказиладиган Tashkent Content Market (TCM) халқаро контент бозорининг расмий тақдимоти бўлиб ўтди. Тадбир 2027 йил 4–5 февраль кунлари Тошкентда ўтказилади.

МДҲ мамлакатларидаги энг йирик контент бозорларидан бири бўлиши кутилаётган TCM 5 500 квадрат метр майдонда 50 дан ортиқ давлатдан 3 мингдан зиёд иштирокчини жамлаши кутилмоқда. Икки павильонда 200 га яқин стенд жойлаштирилади.

TCM’да ўзбек фильмлари, сериаллари, анимация ва рақамли маҳсулотларини хорижий харидорларга таклиф қилиш, контент сотиш ва харид қилиш, лицензиялаш ҳамда халқаро компаниялар билан янги лойиҳалар бўйича келишувлар тузиш имкони бўлади.

Икки кунлик дастурдан контент бозори, халқаро кўргазма, B2B учрашувлар, фильм ва лойиҳалар намойиши, маҳорат дарслари ҳамда шартномалар имзолаш ўрин олган.

Контент маркази томонидан ташкил этилаётган ушбу лойиҳадан мақсад — миллий контент экспортини кенгайтириш, маҳаллий ишлаб чиқарувчиларни халқаро медиа бозорига олиб чиқиш ва Тошкентни минтақавий медиа марказ сифатида ривожлантиришдан иборат.

@pressuzb