Atamoq, nomlamoq va ism qoʻymoq

Bir kitob tahririda shu soʻzlarning maʼno farqlari seziladigan oʻringa duch keldim. Bu soʻzlar sinonim boʻlsa-da, baʼzi oʻrinlarda bir-birining oʻrnida qoʻllana olmaydi.

Atamoq soʻzi nom bermoq, ot qoʻymoq, nomlamoq maʼnosida kelganda jonli va jonsiz predmetlarga nisbatan ishlatilaveradi.

Nomlamoq soʻzi nom qoʻymoq, nom bermoq, atamoq kabi maʼnolarga ega. Lekin u asosan jonsiz predmetlarga nisbatan qoʻllanadi.

Nom qoʻymoq iborasi esa jonsiz predmetlarga va hayvonlarga nisbatan tatbiq etiladi.

Ism qoʻymoq iborasi faqat insonga ot qoʻyishni anglatadi.

Endi kitobda duch kelgan jumlaga qaytamiz:

Rasmdagi bola va kuchukka ism qoʻying.

Bu jumla tahrir nuqtayi nazaridan xato. Variantlar:

Rasmdagi bola va kuchukka ot qoʻying.
👉 Bola va kuchuk yonma-yon kelishi, bu oʻrinda inson va hayvonga bir darajada munosabat boʻlishi unchalik toʻgʻri emas.

Rasmdagi bola va kuchukni nomlang.
👉 Insonga nisbatan nomlang soʻzini ishlatmaslik kerak.

Rasmdagi bolaga ism, kuchukka nom qoʻying (yoki bering).
✅ Variantlar ichida eng maqbuli shu.

@oriftolib | Sahifalarimiz