ДОБРЫЯ ПЕРАМЕНЫ

У камеры ШІЗА я часта ўспамінаў розныя эпізоды са свайго жыцця. Не таму, што спецыяльна спрабаваў нешта аднавіць у памяці, проста часу там шмат, ты ляжыш на нарах, глядзіш у столь і ў галаву прыходзіць тое, пра што гадамі не думаў.

Так аднойчы ўспомніў выбары 2007 года. Мне тады было сорак, я балатаваўся ў Гомельскі абласны Савет дэпутатаў па Валгаградскай выбарчай акрузе №14. Была ў мяне і перадвыбарчая ўлётка, звычайная, чорна-белая, мая фатаграфія, прозвішча, галачка ў квадраціку. А ўнізе віншаванне з Калядамі і Новым годам: «Пусть Новый год принесет всем нам и каждому в отдельности добрые перемены».

У 2007 годзе я, вядома, не думаў, што калісьці буду ўспамінаць гэтыя словы з турэмнай камеры. Тады я ішоў на выбары і хацеў рабіць тое, што павінен рабіць кандыдат: сустракацца з людзьмі, распавядаць пра сваю праграму, адказваць на пытанні.