“Asaka” gaz toʻldirish shoxobchasida modernizatsiya ishlari boshlandi

Oʻzbekiston Respublikasi Prezidentining 2026-yil 12-sentyabrdagi “Aholini suyultirilgan gaz bilan taʼminlash tizimini isloh qilish va bozor mexanizmlarini bosqichma-bosqich joriy etish chora-tadbirlari toʻgʻrisida”gi PQ-326-son qarori ijrosini taʼminlash maqsadida “Hududgaz Andijon” gaz taʼminoti filialining “Asaka” gaz toʻldirish shoxobchasini modernizatsiya qilish ishlari boshlandi.

Shu munosabat bilan Prezidentning yoqilgʻi-energetika masalalari boʻyicha maslahatchisi Behzod Normatov, “Hududgaztaʼminot” AJ Boshqaruv raisi Marufxon Xodjayev hamda boshqa mutasaddilar ishtirokida shoxobchada oʻrganish ishlari olib borildi. Masʼullar modernizatsiya doirasida amalga oshirilishi rejalashtirilgan ishlar, ularning bajarilish muddatlari va kutilayotgan natijalar bilan tanishdi.

Ayni paytda “Asaka” gaz toʻldirish shoxobchasida umumiy hajmi 400 m³ boʻlgan 8 ta sigʻim mavjud boʻlib, suyultirilgan gazni saqlash quvvati 180,2 tonnani tashkil etadi. Modernizatsiya ishlari yakunlangach, shoxobchada umumiy hajmi 1 400 m³ boʻlgan 18 ta sigʻim tashkil etilib, saqlash quvvati 630,7 tonnaga yetkaziladi.

Shuningdek, qoʻshimcha 30 ta gaz quyish kolonkasi oʻrnatilib, shoxobchaning oylik gaz quyish quvvati 1 755 tonnadan 5 265 tonnagacha oshiriladi. Bu esa suyultirilgan gazni aholiga yetkazib berish imkoniyatlarini kengaytirish, taʼminot davriyligini qisqartirish va xizmat koʻrsatish sifatini oshirishga xizmat qiladi.

Oʻrganishlar davomida “Hududgaztaʼminot” AJ rahbari modernizatsiya ishlarini jadallashtirish, suyultirilgan gazni isteʼmolchilarga yetkazib berish muddatlarini qisqartirish hamda taqsimot jarayonlarida shaffoflikni yanada kuchaytirish va korrupsion xavflarni kamaytirish boʻyicha mutasaddilarga tegishli topshiriqlar berdi.

💬Facebook |👉Telegram |▶️ YouTube |📷Instagram |📱 X |🌐 hududgaz.uz