​​⚡️Святлана Ціханоўская ў Цэнтры Беларускай Салідарнасці!

Падчас свайго афіцыйнага візіту ў Польшчу Святлана Ціханоўская наведала ЦБС! Нацыянальная лідарка правяла сустрэчу з нашымі супрацоўнікамі. Падчас мерапрыемства мы абмеркавалі праблемы, з якімі да нас найчасцей звяртаюцца беларусы ў Польшчы, выпадкі дыскрымінацыі нашых суайчыннікаў, а таксама падтрымку, якую мы аказваем не толькі беларусам, але і нашым братам з Украіны.

Святлана шчыра падзякавала нам за зробленую працу і паабяцала аказаць дапамогу на ўсіх магчымых узроўнях. Нацыянальная лідарка падкрэсліла, што падчас сустрэчы з міністрам унутраных справаў Марыушам Каміньскім ёй былі дасягнутыя пэўныя дамоўленасці. У адпаведнасці з імі была створана працоўная група па распрацоўцы рашэнняў, якія значна палегчаць працэс легалізацыі для беларусаў у Польшчы. У групу былі ўключаныя ў тым ліку юрысткі ЦБС.

Акрамя таго, Святлана Ціханоўская пабачылася з вучнямі нашай школкі! На сустрэчы былі як дзеткі з Беларусі, так і вучні, якія прыехалі да нас з Украіны. Дзеткі падарылі палітыку яе партрэт, а таксама заспявалі песню «Тры чарапахі»! Сустрэча атрымалася па-сапраўднаму кранальнай.

Мы дзякуем Святлане за ўвагу да нашай арганізацыі і падтрымку ўсіх беларусаў у Польшчы! У салідарнасці наша сіла!