Падчас дыскусіі Юлія Міцкевіч прадставіць дзве канцэпцыі рэформаў у сферах гендарнай палітыкі і супрацьдзеяння дыскрымінацыі.
Канцэпцыя рэформы гендарнай палітыкі была распрацавана незалежнай эксперткай па ініцыятыве Прадстаўніцтва па сацыяльнай палітыцы, а канцэпцыя антыдыскрымінацыйнага заканадаўства — экспертнай групай пад каардынацыяй Беларускага Хельсінкскага Камітэта ў супрацоўніцтве з Саветам Еўропы.
Абедзве канцэпцыі — першыя комплексныя дакументы такога кшталту, распрацаваныя для будучай дэмакратычнай Беларусі.
❤️ Канцэпцыя рэформы гендарнай палітыкі вызначае, якім павінна быць сучаснае заканадаўства ў сферы гендарнай роўнасці. Яна прапануе аснову для законаў аб гендарнай роўнасці і аб супрацьдзеянні хатняму гвалту.
Адным з прынцыпова новых элементаў канцэпцыі з'яўляецца ўвядзенне карэкцыйнага падыходу замест патэрналісцкага, які дзейнічае сёння. Карэкцыйны падыход накіраваны на выкараненне сацыяльнай няроўнасці праз ліквідацыю прычын і наступстваў дыскрымінацыі. Пры патэрналісцкім падыходзе дзяржава бярэ ўразлівыя групы пад апеку, але не ліквідуе сістэмную і структурную няроўнасць і дысбаланс улады.
Дакумент прапануе прававыя механізмы і інструменты, неабходныя для рэальнага дасягнення гендарнай роўнасці.
❤️Канцэпцыя антыдыскрымінацыйнага заканадаўства ўпершыню прапануе комплексную прававую рамку для абароны ад дыскрымінацыі. Яна ўводзіць у прававое поле Беларусі сучасныя паняцці і механізмы, у тым ліку паняцце харасменту, і закладвае прававую аснову для абароны ад дыскрымінацыі па розных прыкметах.
У далейшым гэты дакумент можа стаць асновай для распрацоўкі іншых заканадаўчых рашэнняў у сферы супрацьдзеяння дыскрымінацыі, каб развіццё гэтай сферы адбывалася паслядоўна і сістэмна.
«Дыскрымінацыя, няроўнасць і сацыяльная несправядлівасць — гэта сістэмныя праблемы, таму і вырашаць іх неабходна сістэмна. Заканадаўчыя змены — адзін з ключавых інструментаў пабудовы дэмакратычнай дзяржавы, у якой правы і годнасць кожнага чалавека будуць сапраўды абаронены»,
— адзначае Юлія Міцкевіч.
Запрашаем далучыцца да абмеркавання!
📍 Варшава, Канферэнцыя «Новая Беларусь»
🕔 17:15–18:15
Панэль № 3: «Постлукашэнкаўская Беларусь. Рэформы. Перспектывы. Бачанне будучыні»