Аб’яднаны Пераходны Кабінет Беларусі

Беларускія добраахвотнікі, ветэраны і іх сем’і могуць звяртацца па дапамогу з юрыдычнымі, міграцыйнымі і сацыяльнымі праблемамі

Намесніца прадстаўніцы Аб’яднанага Пераходнага Кабінета па сацыяльнай палітыцы Анастасія Махамет, якая адказвае за пытанні добраахвотнікаў і іх сем’яў, прыняла ўдзел у Форуме Астрожскіх ва Украіне. Падчас форуму яна выступіла ў дыскусіі «Беларускія добраахвотнікі ва Украіне: ад удзелу ў вайне да стратэгічнага партнёрства».

Па выніках дыскусіі Анастасія Махамет звярнулася да беларускіх добраахвотнікаў, якія служаць або служылі ва Украіне, ветэранаў і іх сем’яў:

«Калі вы сутыкаецеся з юрыдычнымі, міграцыйнымі ці сацыяльнымі праблемамі, звязанымі са службай або яе наступствамі на тэрыторыі Украіны, калі ласка, звяртайцеся.
Мне не важна, у якім падраздзяленні вы служыце ці служылі. Я не прадстаўляю інтарэсы асобных падраздзяленняў, я працую з праблемамі людзей».

Звярнуцца можна як па кансультацыю ў канкрэтнай сітуацыі, так і па дапамогу ў падрыхтоўцы звароту. На падставе асобнага кейса таксама можа быць падрыхтаваны абязлічаны запыт, а сітуацыі, якія патрабуюць больш грунтоўнай працы, могуць разглядацца індывідуальна.

Кожны такі зварот дапамагае не толькі шукаць рашэнне канкрэтнай праблемы, але і выяўляць абмежаванні ў заканадаўстве і практыцы яго прымянення, якія патрабуюць сістэмнай працы.

❗️Канфідэнцыйнасць захоўваецца.
Зварот можа заставацца цалкам непублічным. Гісторыя канкрэтнага чалавека можа быць апублікаваная толькі з яго згоды і ў тым аб’ёме, на які ён пагадзіўся.

Пакуль звяртацца можна непасрэдна да Анастасіі Махамет: a.makhamet@belaruscabinet.org

У далейшым плануецца стварыць асобныя інфармацыйныя пляцоўкі, дзе можна будзе атрымаць кансультацыю, патэлефанаваць або звярнуцца ў вызначаныя прыёмныя дні.

«Калі вам ужо сказалі: “Нічога зрабіць нельга”, усё роўна пішыце. Спачатку давайце паглядзім, што там сапраўды напісана».

Беларускія заводы фіксуюць падзенне попыту і скарачаюць вытворчасць

Афіцыйная статыстыка паведамляе пра рост беларускай прамысловасці. Але яе рэальны стан можна прасачыць па ўнутраных дакументах самога Міністэрства эканомікі.

Прадстаўніцтва па эканоміцы і фінансах Аб’яднанага Пераходнага Кабінета прааналізавала бюлетэнь Навукова-даследчага эканамічнага інстытута (НДЭІ) Мінэканомікі з вынікамі апытання кіраўнікоў беларускіх прамысловых прадпрыемстваў.

Адзін з ключавых сігналаў — падзенне попыту. За месяц яго баланс знізіўся на 14 пунктаў і перайшоў у адмоўную зону, да −6 пунктаў.

На прадпрыемствах скарачаецца і вытворчасць. Пра гэта паведамілі 36% апытаных кіраўнікоў.
Пагаршаюцца і фінансавыя паказчыкі: 34% прадпрыемстваў паведамілі пра зніжэнне прыбытку, а сярэдняя рэнтабельнасць галіны склала 6,8%.

Індэкс дзелавой актыўнасці заводаў складае 34 пункты пры мяжы росту ў 50 пунктаў. Ніжэй за гэтую мяжу паказчык знаходзіцца ўжо некалькі месяцаў.

Індэкс прамысловага аптымізму складае −18 пунктаў. Адказаў кіраўнікоў прадпрыемстваў «стала горш» стабільна больш, чым «стала лепш».

Такім чынам, афіцыйная статыстыка дэманструе «ўстойлівы рост», у той час як унутраныя апытанні самога Міністэрства эканомікі фіксуюць адваротнае: попыт падае, дзелавая актыўнасць знаходзіцца на мінімальным узроўні, ацэнкі кіраўнікоў прадпрыемстваў застаюцца адмоўнымі.

Рэальны стан беларускай прамысловасці адлюстроўваюць не тэлевізійныя зводкі, а лічбы ва ўнутраных дакументах дзяржаўных органаў.

Намеснік кіраўніцы Аб’яднанага Пераходнага Кабінета, кіраўнік НАУ Павел Латушка разам са спецыяльным прадстаўніком міністра замежных спраў Польшчы па супрацоўніцтве з беларускімі дэмакратычнымі сіламі Адамам Халацінскім і супрацоўнікам па ўсходняй палітыцы Пасольства ЗША ў Польшчы Кевінам Дойлам прывіталі ў Варшаве групу з 10 былых палітычных зняволеных, якія плануюць падаць дакументы на міжнародную абарону і легалізацыю ў Польшчы.

Гэтая магчымасць з’явілася дзякуючы Міністэрствам замежных спраў Польшчы і Літвы, Міністэрству унутраных спраў Польшчы, Галоўнай камендатуры Пагранічнай службы Польшчы, НАУ, ініцыятыве «Вольныя», Цэнтру Беларускай Салідарнасці, фонду «Краіна для Жыцця», Freedom House і іншым арганізацыям грамадзянскай супольнасці. Каардынатарамі выступілі Аб’яднаны Пераходны Кабінет і Офіс Святланы Ціханоўскай.

«Сёння, яшчэ непасрэдна перад прыбыццём вызваленых палітычных зняволеных у Варшаву, у мяне адбылася размова з кіраўніцтвам Галоўнай камендатуры Пагранічнай службы Польшчы пра тое, што з панядзелка пачнецца працэдура падачы дакументаў на міжнародную абарону ў Польшчы для былых палітвязняў: 9 з іх плануюць распачаць працэс легалізацыі ў Варшаве, адзін — у Беластоку.

Асаблівая ўдзячнасць польскім пагранічнікам за такую аператыўную рэакцыю і гатоўнасць аказваць садзейнічанне дэпартаваным беларусам. У нас склалася добрае ўзаемадзеянне яшчэ з афармлення папярэдніх груп палітзняволеных, якія вымушана апынуліся на тэрыторыі Польшчы. Дзякуй уладам Польшчы за станоўчае стаўленне і салідарнасць. Галоўнай камендатурай Пагранічнай службы Польшчы ўжо прызначаны афіцэр, які будзе каардынаваць прыём дакументаў на мінжнародную абарону на наступным тыдні», — адзначыў Павел Латушка.

Разам мы гатовыя далей працаваць над аднаўленнем справядлівасці ва Украіне і ў Беларусі

«Незалежная Украіна — стратэгічна важны фактар захавання незалежнай Беларусі і аднаўлення ўлады беларускага народа на тэрыторыі нашай краіны», — адзначыў намеснік кіраўніцы Аб’яднанага Пераходнага Кабінета, кіраўнік НАУ Павел Латушка падчас 5-га Форуму Астрожскіх: беларуска-ўкраінскага дыялогу пра бяспеку і супрацоўніцтва.

У дыскусіі ў рамках першай палітычнай панэлі таксама прынялі ўдзел дарадца кіраўніка Офіса Прэзідэнта Украіны Міхаіл Падаляк, пасол па асаблівых даручэннях МЗС Украіны Яраслаў Чарнагор, народны дэпутат Вярхоўнай Рады Украіны Багдан Ярэменка, галоўны дарадца Святланы Ціханоўскай Франак Вячорка, мадэратарм дыскусіі выступіў дырэктар Цэнтра «Еўрапейскі Дыялог» Анатоль Лябедзька.

Падчас дыскусіі Павел Латушка прывёў прыклады канкрэтных вынікаў супрацоўніцтва з Украінай, перш за ўсё па трох найважнейшых прававых кірунках, па якіх працуюць Кабінет, НАУ, беларускія праваабарончыя арганізацыі і грамадскія ініцыятывы:

1. Ваеннае злачынства — дэпартацыя ўкраінскіх дзяцей

Павел Латушка адзначыў, што яшчэ ў 2023 годзе НАУ перадало дзве камунікацыі ў Офіс пракурора Міжнароднага крымінальнага суда па фактах незаконнага перамяшчэння не менш чым трох з паловай тысяч украінскіх дзяцей, у тым ліку дзяцей-сірот, у Беларусь, а таксама іх індактрынацыі ў інтарэсах «расійскага свету».

«Мы дасягнулі выніку, бо ўжо ад пачатку лета 2024 года мы пачалі фіксаваць рэзкае запавольванне, а пазней фактычнае спыненне масавых перамяшчэнняў украінскіх дзяцей. Лукашэнка на гэтым кейсе ўпершыню адчуў рызыку персанальнай пагрозы адказнасці і спалохаўся. Працэс масавага вывазу дзяцей фактычна быў спынены».

Асобна Павел Латушка падкрэсліў, што па выніках паездкі дэлегацыі дэмакратычных сіл на чале са Святланай Ціханоўскай у Кіеў у траўні бягучага года, на просьбу Каардынацыйнага штаба Украіны па абыходжанні з ваеннапалоннымі Міністэрства абароны Украіны, каманда НАУ перадала назапашаныя даныя па здзейсненых злачынствах супраць украінскіх дзяцей і персанальныя даныя ўкраінскіх дзяцей-сірот, якія могуць быць карыснымі дзеля таго, каб вяртаць украінскіх дзетак на радзіму, ва Украіну.

Павел Латушка падкрэсліў гатоўнасць працягваць супрацоўніцтва з украінскім бокам па пытанні дапамогі вяртанню ўкраінскіх дзяцей і прыцягнення Лукашэнкі да адказнасці за ваеннае злачынства.

2. Злачынствы супраць чалавечнасці супраць беларускага народа

Падчас дыскусіі Павел Латушка падкрэсліў, што 12 сакавіка гэтага года Офіс пракурора Міжнароднага крымінальнага суда абвясціў пра пераход да стадыі расследавання «беларускай сітуацыі». І ў гэтай сувязі падтрымка Украінай дадзенага расследавання была б вельмі карысная:

«Па выніках нашага візіту ў Кіеў, 13 ліпеня Святланай Ціханоўскай і мною быў падпісаны і накіраваны ліст міністру замежных спраў Украіны Андрэю Сібігу з просьбай разгледзець магчымасць накіравання звароту ў адпаведнасці з артыкулам 14 Рымскага статута Міжнароднага крымінальнага суда з мэтай прадстаўлення ў Офіс пракурора Міжнароднага крымінальнага суда інфармацыі аб учыненні злачынстваў дэпартацыі, злачынстваў пераследу супраць беларускага народа. Мы ведаем, што шмат беларусаў з 2020 года па 2022 год уцякалі ва Украіну, і Украіна магла б дапамагчы Літве і Міжнароднаму крымінальнаму суду ў расследаванні гэтага злачынства».

3. Злачынства агрэсіі

Павел Латушка падкрэсліў, што ў 2025 годзе менавіта намі прапанаваны і пралабіраваны папраўкі ў рэзалюцыі Еўрапейскага парламента і ПАРЕ, якія заклікаюць да стварэння Спецыяльнага трыбунала за злачынства агрэсіі супраць Украіны.

«Тут асабліва важныя нашы намаганні, якія звязаныя з прыняццем адпаведных рэзалюцый у ПАРЕ, бо Рада Еўропы з'яўляецца тым бокам, які падпісаў пагадненне аб стварэнні Спецыяльнага трыбунала. І дзякуючы таму, што ёсць дэлегацыя Каардынацыйнай Рады ў ПАРЕ, мы ўнеслі папраўку аб тым, што Лукашэнка і яго хаўруснікі будуць адказваць за акт агрэсіі.

Разам мы гатовыя далей працаваць над аднаўленнем справядлівасці ва Украіне і ў Беларусі».

Аб’яднаны Пераходны Кабінет, Офіс Святланы Ціханоўскай, Цэнтр Беларускай Салідарнасці і ініцыятыва «Вольныя» інфармуюць, што прыблізны час прыбыцця ў Варшаву групы з 10 былых палітвязняў, якія былі вызвалены дзякуючы намаганням Злучаных Штатаў Амерыкі 16 верасня, — сёння каля 15:30.

Прыбыццё плануецца ў Цэнтр Беларускай Салідарнасці па адрасе Oleandrów 6, 00-636 Warszawa.

Групу суправаджае каардынатарка ініцыятывы «Вольныя» Вераніка Станкевіч.

Беларусь і Расія ўзгаднілі ўжо 107 са 110 пунктаў новай праграмы інтэграцыі

Прадстаўніцтва па эканоміцы і фінансах Аб’яднанага Пераходнага Кабінета прааналізавала закрыты ліст Міністэрства эканомікі ў Савет Міністраў пра «Асноўныя напрамкі» Саюзнай дзяржавы на 2027–2029 гады з архіва BELPOL.

Паводле дакумента, узгоднена ўжо 107 са 110 пунктаў інтэграцыйнай праграмы. Яны датычацца ў тым ліку адзінай аграрнай палітыкі, саюзных стандартаў, статусу «тавар Саюзнай дзяржавы» і адзінага плацежнага контуру — лічбавых валют Нацыянальнага банка Беларусі і Цэнтральнага банка РФ, трансгранічных QR-плацяжоў і разлікаў токенамі.

Пры гэтым сустрэчныя абавязацельствы расійскага боку застаюцца невыкананымі. Паводле прыведзенай у лісце ацэнкі «Белнафтахіма», падпісаныя дамоўленасці па стварэнні адзінага рынку нафты «застаюцца дэкларацыяй». Замест адкрыцця рынку расійскі бок прапануе фармулёўку «развіццё супрацоўніцтва», якая не прадугледжвае канкрэтных абавязацельстваў.

Паказальны і вынік праграмы на 2024–2026 гады: 80–85% мерапрыемстваў прапануецца прызнаць выкананымі, хоць само Мінэканомікі характарызуе іх як «пераважна працэснага характару».

Іншымі словамі, інтэграцыйныя дакументы працягваюць узгадняцца, у той час як частка ранейшых дамоўленасцяў не дала заяўленых практычных вынікаў.

Юлія Міцкевіч: Важна было бачыць, як людзі пасля гадоў у турме атрымліваюць першы глыток свабоды

Выконваючая абавязкі прадстаўніцы Аб’яднанага Пераходнага Кабінета па сацыяльнай палітыцы Юлія Міцкевіч распавяла пра сустрэчу ў Вільні 25 палітвязняў, вызваленых 16 верасня.

«Для мяне гэта была першая група палітвязняў, якую я сустракала ўжо ў новай ролі. Учора я адначасова была і прадстаўніцай Кабінета, адказвала на пытанні журналістаў, і звычайнай валанцёркай: паказвала людзям, дзе душ, кухня, дзе можна паесці, куды пайсці да медыка, дапамагала атрымаць тэлефоны і пакеты першай дапамогі».

Асабліва моцным момантам, паводле Юліі Міцкевіч, сталі сустрэчы вызваленых з роднымі, сябрамі і калегамі:

«Было вельмі шмат людзей, усе хацелі пагаварыць, абняцца. Для мяне было вельмі важна проста назіраць, як людзі, якія правялі шмат гадоў у беларускай турме, атрымліваюць гэты глыток свабоды і магчымасць нарэшце пабачыць тых, каго даўно не бачылі і па кім вельмі сумавалі».

Сярод вызваленых Юлія Міцкевіч сустрэла свайго шматгадовага сябра і калегу Андрэя Аляксандрава, а таксама Ірыну Злобіну, Таццяну Кузіну, Людмілу Чэкіну і іншых. Ад адной з вызваленых яна таксама атрымала вестку ад палітзняволенай Вольгі Брыцікавай: яна трымаецца і захоўвае добры настрой.

Цяпер вызваленыя атрымліваюць сабраную для іх неабходную дапамогу. Тыя, хто застаецца ў Літве, будуць атрымліваць кансультацыі па пытаннях легалізацыі, дакументаў і іншых міграцыйных працэдур. Частка вызваленых плануе пераехаць у Польшчу, дзе іх далей будзе суправаджаць мясцовая каардынацыйная каманда.

«Гэта ўжо наладжаныя працэсы. Дзякуй камандзе кааліцыі праваабарончых і гуманітарных арганізацый, маёй каляжанцы Вользе Зазулінскай і нашым партнёрам, якія ведаюць, як усё гэта арганізаваць. Са свайго боку я буду працягваць дапамагаць і працаваць, у тым ліку над далейшым працэсам вызвалення палітвязняў».

Прадстаўніцтва па сацыяльнай палітыцы працягне ўдзельнічаць у падтрымцы вызваленых і іх далейшай адаптацыі, а таксама ў працы, звязанай з працэсам вызвалення іншых палітвязняў.