bellitinfo

📒 Кніга Насты Рагатко выйшла па-беларуску.

Наста Рагатко падзялілася ў сацсетках навіной пра выхад ейнай кнігі “Насі з сабой” у выдавецтве “Логвінаў” на беларускай мове. Расейскамоўны арыгінал кнігі “Насі з сабой” выйшаў восенню 2025 году.

Пераклаў твор Іван Стасіевіч.

Падрабязней 👈

📖 Нагадваем пра цікавыя падзеі ў Вільні на гэтым тыдні:

✔️1 кастрычніка: лекцыя Аляксандра Фядуты “Імперыя супраць моладзі. Гісторыя віленскіх філаматаў”.

🕖 18.30 (час мясцовы).
📍 Віленскі беларускі музей імя Івана Луцкевіча (Vilniaus g. 20)

Падрабязней

✔️2 кастрычніка: лекцыя Аляксандра Фядуты “Раман Уладзіміра Караткевіча “Каласы пад сярпом тваім”: учора, сёння, назаўжды”.

🕖 18.00
📍 Беларускі Замак, Naujoji Riovonių, 10

Падрабязней

Мерапрыемствы ладзяцца ў межах праграмы “ArtPower Belarus” у сумесным праекце Міжнароднага Саюза беларускіх пісьменнікаў і кампаніі “Будзьма беларусамі”.

Уваход вольны.

📚 У Оршы малююць новы мурал з Уладзімірам Караткевічам, але ёсць нюанс.

Увесну ў Оршы быў знішчаны мурал, намаляваны да 90-годдзя Уладзіміра Караткевіча. Малюнак быў зроблены аршанскім мастаком Дзмітрыем Талкачовым.

Падчас рэмонту дома №2 па вул. Марата малюнак аказаўся схаваным пад тэрмашубай, і мясцовыя службы не планавалі яго аднаўляць. Але знікненне мурала выклікала хвалю абурэння, і выяву класіка ўсё ж такі вырашылі вярнуць.

На той самай сцяне таго самага дома зноў будзе мурал, да 96-х угодкаў пісьменніка (26 лістапада) яго абяцае скончыць мастачка Любоў Рабека. У гэтым мастацкім жанры яна працуе толькі другі год.

🍁 “Літаратурная Беларусь” — пампуй і чытай вераснёўскі нумар.

Выйшаў вераснёўскі нумар штомесячніка “Літаратурная Беларусь” (№9, 2026). Выпуск адкрываюць радкі з новай паэмы Сяргея Законнікава “Выхад у космас”.

Таксама ў нумары чытачы знойдуць прозу Алеся Вешторта, Паўла Ляхновіча і Віктара Сазонава, вершы Тамары Аўсяннікавай і Міколы Канановіча, успаміны Алены Літвіной пра Ніну Мацяш, а таксама эсэ, артыкулы і навіны з літаратурнага замежжа.

Падрабязней ⬅️

📗 Выйшаў калектыўны зборнік смешных тэкстаў “Хіханькі-хаханькі”.

У выдавецтве Bukinist:ka Press выйшаў калектыўны гумарыстычны зборнік “Хіханькі-хаханькі”, тэксты якога былі напісаныя ў межах пісьменніцкай лабараторыі, арганізаванай праектам “Расцяжэнне”.

📖 У кнізе дакументальныя эсэ суседнічаюць з аўта-фікшн замалёўкамі, магічнымі аповедамі і сучаснымі казкамі.

23 свежыя тэксты пра жыццё тут і зараз, пад адной вокладкай — новыя галасы, ужо знаёмыя імёны і знакамітыя аўтар:кі.

Падрабязней ⬅️

🐭 30 верасня ў Мінску: батлеечны спектакль "Прыгоды мышкі Пік-Пік".

Літаратурны музей Максіма Багдановіча запрашае на новы батлеечны спектакль "Прыгоды мышкі Пік-Пік" (узрост 5+) паводле кнігі Людмілы Рублеўскай.

"Шссс.... Чуеце таямнічы шоргат?.. У музеі Багдановіча завялася мышка! Але не пужайцеся — гэта не зусім звычайная мышка: яна вельмі любіць салодкае, марыць выйграць у конкурсе прыгажосці, заняцца бізнесам, праславіцца на тэатральнай сцэне", — напісана ў анонсе.

📖 Перад спектаклем аўтарка распавядзе гісторыю напісання кнігі і падпіша асобнікі.

Колькасць месцаў абмежаваная. Запіс па тэл. +375 17 355 22 95. Уваходны квіток — 10 рублёў.

⏰ Пачатак а 18:00.
📍 Філіял "Літаратурны музей Максіма Багдановіча" (вул. М.Багдановіча, 7а)

✍️ Прыём заявак на літконкурс “Экслібрыс” — хутка дэдлайн.

Да 1 кастрычніка працягваецца прыём заявак на традыцыйны літаратурны конкурс “Экслібрыс”, які арганізоўвае Міжнародны саюз беларускіх пісьменнікаў.

Патронкай гэтага сезону конкурсу стала Алаіза Пашкевіч (Цётка) — пісьменніца, грамадская дзяячка, публіцыстка, і адну са стваральніц новай беларускай літаратуры. Сёлета спаўняецца 150 гадоў з дня яе нараджэння.

Да ўдзелу ў конкурсе прымаюцца непублікаваныя тэксты ў наступных жанрах:
✔️ проза
✔️ паэзія
✔️ дзіцячая літаратура
✔️ эсэістыка

Узрост удзельнікаў не абмежаваны. Па выніках конкурсу плануецца публікацыя твораў пераможцаў.

📕Дэдлайн: 1 кастрычніка 2026 году.

✍️ Дасылайце творы з пазнакай у тэме “Экслібрыс 2026” на пошту bellit.info@gmail.com.

📘 Выйшла кніга Ігара Сідарука “У пашчы чорнага месяца”.

Кніжную серыю “Брукаванка” папоўніла новая кніга аднаго з найбольш непрадказальных аўтараў беларускага літаратурнага андэграўнда Ігара Сідарука “У пашчы чорнага месяца”.

Ігара Сідарука немагчыма надоўга замкнуць у межах адной эстэтыкі. Ён можа быць лірыкам, драматургам, аўтарам чорнага бурлеску і стваральнікам “абсурдэлек”, аднак за ўсімі гэтымі маскамі застаецца пазнавальны голас — рэзкі, іранічны і балюча чулы.

Падрабязней 👈

🏆 Дзмітры Плакс стаў лаўрэатам шведскай прэміі як драматург і рэжысёр.

Паэт, празаік, перакладчык, мастак і кіраўнік Міжнароднага саюза беларускіх пісьменнікаў Дзмітры Плакс (Dmitri Plax) атрымаў прэстыжную шведскую прэмію Bennypriset.

“На працягу трох дзесяцігоддзяў у якасці драматурга, аўтара і рэжысёра ён пашырае гарызонты шведскага тэатральнага мастацтва [...]. Ён заўсёды трымае руку на пульсе сучаснасці і адчувае ўнікальную здольнасць тэатра адлюстроўваць балючыя праблемы чалавецтва, бескампрамісна адкрываючы прастору для важных галасоў і непасрэднага жыццёвага досведу".

✍️ Bennypriset — гэта штогадовая шведская культурная прэмія ў памеры 100 000 шведскіх крон, заснаваная ў 2020 годзе ў памяць пра вядомага тэатральнага дзеяча і кіраўніка Бені Фрэдрыксана (Benny Fredriksson).

Падрабязней ⬅️

📓 Выходзіць дапоўненае перавыданне “Кароткай гісторыі прэміі Г.” Паўла Анціпава.

Дзесяць гадоў таму празаік і выдавец Павел Анціпаў пачаў пісаць кнігу “Краткая история премии Г.”, дзе ў займальнай форме апавядаецца пра будні арганізатара адной з літаратурных прэмій.

Надрукаваная кніга была самвыдатам праз тры гады пасля напісання. Цяпер, дзякуючы супрацы выдавецтваў “Лысы чэрап” і Bukinist:ka Press выходзіць юбілейнае перавыданне.

Падрабязней 👈

📘 Адкрыты перадзаказ на раман амерыканскага аўтара бэстсэлераў.

Выдавецтва Gutenberg Publisher заключыла кантракт на выданне па-беларуску новага рамана “Галівуд, фінал” Джона Грына. Аўтар бэстсэлераў для дзяцей і падлеткаў вяртаецца з першым раманам для дарослых.

У цэнтры твора — гісторыя кахання дваіх актораў, Кая і Джуніпер. Пачуцці нараджаюцца на здымачнай пляцоўцы і праходзяць выпрабаванне публічнасцю, калі фільм з іх удзелам “Эндзі Уорхал ніколі не старэе” выклікае шалёны рэзананс.

На беларускую раман пераклала Марына Дзергачова.

Падрабязней ⬅️

✍️ Ідзе прыём заявак на Art Connect Residency ў Славакіі.

Гэта 90-дзённая рэзідэнцыя для мастакоў(-чак) і пісьменнікаў(-ніц).

Можна падавацца візуальным мастакам(-чкам), аўтарам(-кам), якія працуюць з лічбавым мастацтвам, пісьменнікам(-цам) і культурным прафесіяналам(-кам) любой нацыянальнасці. Падавацца могуць толькі тыя, хто легальна жыве у краіне Creative Europe (акрамя Славакіі).

📖 Калі: 1 сакавіка — 29 траўня 2027.

Прапануецца: жыллё ў цэнтры, працоўная прастора у Kino Úsmev, ментарская падтрымка, знаёмствы з лакальнай культурнай сцэнай, 30 EUR у дзень на харчаванне і лакальны транспарт, дарожная падтрымка 400–800 EUR і дадатковыя выплаты.

📕 Дэдлайн: 27 верасня, 23:59 CEST.

Падрабязней 👈

🔊 "Свіцязянка" Адама Міцкевіча з'явілася ў аўдыя.

Ініцыятыва "Беларуская літаратура", якая стварае аўдыякнігі пераважна класічных твораў, агучыла баладу "Свіцязянка" Адама Міцкевіча.

Гэта твор, заснаваны на народных расказах і легендах з роднай для паэта Наваградчыны, у тым ліку і на паданні пра свіцязянак — вадзяных німфаў, якія нібыта жылі ў водах возера Свіцязь.

"Што гэта за хлопец з поглядам шчасным
Поруч са стройнай дзяўчынай
Крочыць павольна пад месяцам ясным
Берагам Свіцязі сіняй?.."

Слухаць ⬅️

📖 25-27 верасня на кірмашы ў Любліне будзе працаваць стэнд з беларускімі кнігамі.

Асацыяцыя беларускіх выдаўцоў выступіла арганізатарам працы адмысловага беларускага стэнда на кніжным кірмашы ў Любліне (Lubelskie Targi Książki), які пройдзе з 25-га па 27-га верасня.

Таксама цягам трох дзён чытачы змогуць сустрэцца Уладзімірам Арловым, Аляксандрам Лукашуком, Сяргеем Кавалёвым, Анэтай Прымака-Онішк, Наталляй Русецкай, Дар’яй Рак, Аляксеем Дзікавіцкім, Змітром Дзядзенкам і Антонам Бяляевым пры ўдзеле выдавецтваў Gutenberg Publisher, Kamunikat і Rozum.Media.

📚 Апроч таго можна будзе набыць кнігі некаторых іншых выдавецтваў (“Полацкія лабірынты”, Skaryna Press, ініцыятывы “Кніжны вырай”).

Падрабязней 👈

📸 25 верасня ў Мінску: адкрыццё фотавыставы «Жаночыя твары беларускай літаратуры».

25 верасня ў Дзяржаўным музеі гісторыі беларускай літаратуры пачынае працу фотаэкспазіцыя «Жаночыя твары беларускай літаратуры». На выставе прадстаўлены фотапартрэты беларускіх пісьменніц, зробленыя ў 1960–1980-я гады.

Вера Вярба, Валянціна Коўтун, Яўгенія Янішчыц, Ніна Мацяш, Раіса Баравікова, Алена Васілевіч, Нэла Тулупава, Валянціна Аколава, Эдзі Агняцвет, Таіса Бондар — кожная з іх паўстае перад гледачом у сваім непаўторным вобразе.

Аўтар фота — Уладзімір Андрэевіч Крук (1927–2008) — вядомы беларускі фатограф і фотакарэспандэнт, больш за трыццаць гадоў жыцця якога былі звязаны з газетай «Літаратура і мастацтва». Уладзімір Крук больш за 45 гадоў прысвяціў фатаграфіі, стварыўшы вялікі фоталетапіс культурнага жыцця Беларусі.

Уваход вольны.

🗓 Выстава будзе працаваць да 3 студзеня 2027 года.
📍Дзяржаўны музей гісторыі беларускай літаратуры (вул. М.Багдановіча, 13).

📺 Аўтары “Трызубу і Пагоні” і “Сармату” едуць у Люблін.

Аўтары медыя-праектаў “Трызуб і Пагоня” і “Сармат” кампаніі “Будзьма беларусамі” Кацярына Ваданосава, Васіль Калач, Алесь Кіркевіч 25 верасня завітаюць на кніжны кірмаш у Любліне.

Яны выступяць з дыскусіяй-выставай “Гонар і Годнасць”, падчас якой раскрыюць міфы і праўду пра шляхту Вялікага Княства Літоўскага.

Мерапрыемствы ладзяцца ў межах праграмы “ArtPower Belarus” у сумесным праекце Міжнароднага Саюза беларускіх пісьменнікаў і кампаніі “Будзьма беларусамі”.

Падрабязней 👈

📖 У новым выпуску аўтарскага падкаста “Літаратурныя зацемкі” Сяргей Дубавец дзеліцца развагамі па прачытанні дэбютнага рамана Яны Гульцяевай “Linea lateralis”.

Складаная гісторыя сям’і, якая жыве ў паселішчы на возеры Нарач, праца ў летніку “Зубраня”, алкагалізм, балючыя стасункі з маці, якасная фабулярная літаратура і развагі пра мову і тое, што сапраўды “мае значэнне”.

"Кожная зьява тут прадумваецца бяз стомы і зрываў, складаныя калізіі жыцьця падаюцца зусім не дэбютантам, але начытаным, спрактыкаваным аўтарам, таму ўспрымаюцца чытачом, як свой уласны набытак".

✍️ Выпуск даступны ў звыклым аўдыяфармаце, а таксама ў тэкставай версіі.

Слухаць і чытаць ⬅️

📚 Фестываль PRADMOVA распачынаецца ва Уроцлаве: вядомая праграма.

2–4 кастрычніка ва Уроцлаве пройдзе PRADMOVA — фестываль інтэлектуальнай кнігі, які збярэ беларускіх пісьменнікаў і пісьменніц, перакладчыкаў і перакладчыц, выдаўцоў і выдаўчынь, даследчыкаў і даследчыц, мастакоў і мастачак, а таксама музыкаў.

На працягу трох дзён адбудуцца больш за тры дзясяткі сустрэч, дыскусій, кніжных прэзентацый, паэтычных і музычных падзей. Асобная частка праграмы падрыхтаваная для дзяцей.

Сярод удзельнікаў: Альгерд Бахарэвіч, Уладзімір Някляеў, Яанна Бэрнатовіч, Сабіна Брыло, Віктар Бабарыка, Максім Знак, Кацярына Ваданосава і іншыя.

Падрабязней 👈

🔥 Творы Цёткі выдадуць на лацінцы, як пры жыцці аўтаркі.

Выдавецтва Skaryna Press выпускае ў “Віленскай серыі” творы Цёткі (Алаізы Пашкевіч). Кніга, прымеркаваная да 150-годдзя аўтаркі, выйдзе з друку лацінкай.

У выдaнне ўвaйшлі пaэтычныя і прaзaічныя творы аўтаркі, нaпісaныя для дaрослых чытaчоў. Адна з мэтаў кнігі — вярнуць aрыгінaльнaе aбліччa шэрaгу тэкстaў, якія цягам стaгоддзя рабіліся шторазу менш пaзнaвaльнымі aд прaвaпіснaгa і ідэaлагічнaгa рэдaгaвaння.

📖 25 верасня прэзентацыя выдання адбудзецца ў Вільні.

Падрабязней ⬅️