🇰🇬 Қырғызстанның бұрынғы президентінің ұлы сотталды

8 қазанда Бішкек соты бұрынғы президент Алмазбек Атамбаевтың ұлы Қадырбек Атамбаевты "Билікті күшпен басып алу" бабы бойынша 4 жылға бостандығынан айырды.

Қырғызстан социал-демократиялық партиясының жетекшісі Темірлан Сұлтанбеков осы баппен 7 жылға сотталып, мүлкі тәркіленетін болды.
Іс бойынша Әбдірахим Әбдірахманов 8 жылға сотталып, Ермек Ерматовқа 1 жыл пробациялық бақылау тағайындалды. Саясаткер Құбанышбек Қадыров толық ақталды. Ал сот 1 жыл 9 ай жаза кескен Серікбай Қабыланбек тергеу кезінде қамауда өткізген уақыты жаза мерзіміне есептеліп, сот залынан босатылды.

Қадырбек Атамбаев үкімді саяси қысым деп бағалап, билік сайлау алдында халықты қорқытуға тырысып жатыр деп мәлімдеді. Ол анасы мен қарындасына қатысты да қылмыстық іс қозғалғанын айтты.

Тергеу қорытындысында айыпталушылар 2025 жылғы парламент сайлауынан кейін жаппай наразылық пен тәртіпсіздік ұйымдастыруды жоспарлаған делінген. Құқық қорғау органдары қару-жарақ, оқ-дәрі, граната, байланыс құралдары мен ақша тәркіленген деп мәлімдеді. Айыпталушылар тағылған айыптарды жоққа шығарған.