Уаниуаз иааугаз, унарцәахь иугоит,
иуциз акрыҟазар, адунеи иазынхоит.

(Ажәаԥҟа)

Сынтәа, Аԥсны ахақәиҭра 30 шықәса анахыҵуа, лыӡбахә мҳәакәа ҳзавсуам ҳиааира агимн ажәақәа зҩыз апоет Лиолиа Тәанԥҳа. Иахьа лара даниз амш ауп.

"Мамзышьха, Мамзышьха – ҳбаагәара ҳдоуҳа
Дықәаҳҵеит дԥыххаа уа уҵаҟа аӷа!
Аиааира, аиааира! Ишьҭышәх ҳа ҳбираҟ!
Аԥсны ԥшӡа ахақәиҭра шәазықәԥа наҟ-ааҟ!.."

Аибашьра иалиааз абри ажәеинраала ҿаца иацназгоз амузыка аԥиҵеит акомпозитор Кәасҭа Ченгьелиа, анаҩс иҩыза Тото Аџьапуеи иареи еицырҳәон. "Аиааира! Аиааира!" гон аҭабиақәа рҿы, ҳаҷкәынцәа ԥсшьарак роуны иахьаатәоз адәаҿы, ажәларгьы иаразнакала ишьҭырхит.

Аибашьраҿы дҭахеит Лиолиа лашьа заҵә, Аԥсны Афырхаҵа Завер Тәанба. Лхаҭагьы зынӡа ақәра лызнамгеит. Аха инхеит лхәыцра, лцәаҩа, лгәыбылра зцу ажәеинраала ҟаимаҭқәа. Лыԥсы ҭаӡам, аха дымԥсӡеит.

Апоетесса лырҿиареи ллахьынҵеи ртәы еиҳа инарҭбааны ирҳәахьан абра.

🧡 Ахьыуардын шәақәтәа