Ажьҭараамза — жьҭаган ҳҭоуп, аха уажәыгьы џьара-џьара ахьшәа лаҳақәа ахьҿоу уԥылоит. Аамҭақәа еиԥшым, аҳауа аҽыԥсахрагьы иара атәы ҟанаҵоит, уи аҟынтә ари џьоушьо иҟам. Аха ирҳәоит, ажәытә иҟан ҳәа аламала аҿшәара ззымдыруаз, аӡнынӡагьы изычҳауаз аԥсуа лаҳа жәла. Иҭаамкәа инхоз, џьара қәа бааԥсык аԥырхагамхар, лаҳарҩаҵас иара уа амахә иӷьаӷьаӡа иааҿахон. Нас уаҳа аламкәа, ҵыскгьы иазымфакәа, зынӡа ихьахьхьала ианыҟалалак, аԥша иканаԥсагәышьон. Быӷькаԥсан ахнагон уеизгьы, ма иацҭахон 🍂

Ари аҩыза алаҳа Чаҵә Чагә иашҭа иҭагылан, иахҳәаау ажәабжьгьы ыҟоуп (З. Быҭәба ишәҟәы аҟынтә):

Чаҵә Чагәи, Шьақариԥа Рашьыҭи, Абыхә Есыфи Чагә иашҭа иқәгылаз аԥсуа лаҳа ашәшьыра иҵатәан ажәабжьқәа рҳәон...
– Уара, ак уасҳәап, Чагә, – иҳәеит алафҳәаҩ Рашьыҭ, мыртаӷа дахьтәаз.
– Ыы?
– Уааи ҳаисап!
– Иззы?
– Абыржәы абра ҳахьтәоу ажәак ала абри алаҳа сықәуцалозар, иеиԥш зыхшыҩ ҵару дыҟам ҳәа срылалоит, аҩныҟа уганы ақыжә узысшьуеит.
– Уансзықәымцала?
– Санузықәымцала, уара иаҳзушьуеит. Уақәшаҳаҭума?
– Сақәшаҳаҭуп! – иҳәеит Чагә, маҷк даахәыцын.
– Есыфгьы дшаҳаҭуп! – даагәырӷьеит Рашьыҭ, Чагә иқыжә сфап ҳәа. – Аҳы, сықәцал, иулшо збап!..
Чагә абри аамҭаз дҩаҵҟьан, ааигәа зхы ықәҵан итәаны ицәоушәа-ицәамшәа ирзыԥшуаз илацәгьа ду инацәа Рашьыҭ иқәырххан дарбауа, ишилшоз "Да-мшә!" ҳәа ҩыҭирҟьеит.

Абгақәа дызлареишәарыцоз алацәгьа ҟаимаҭ, цәамхьарагьы агымзар акәхарын, аԥшәма ас даныҳәҳәа, иҩаҵууан Рашьыҭ иҩаижәлеит. Рашьыҭгьы, ауаҩы дшәар абыҩҷыда илалоит рҳәоит, дахьтәаз дакӡамызшәа дҩаҵҟьан, аҟәардә ишьапы ықәрс дууаӡа дыԥан ихаҟны иҟаз амахә дҩахьынҳалт. Ишьапқәагьы дҩарыхан наҟ амахә хыхь ианаҿаиршә, дкәалкәало даакынхалт. Дамшәгьы аԥхьатәи ашьапқәа аҟәардә инықәнаргылан, икнаҳаз икалҭ иацрасырц аҩаԥамҭаз:
"Иазхоуп!" – длақәҵәҟьеит Чагә. Алагьы аахынҳәит.
– Уаа, нар улбааит, Рашьыҭ!.. – иҳәан ,Чагә икьатеиах ԥҵәо Рашьыҭ днаизыԥшит. – Афырхаҵа, Дамшә! Аҵла иқәуцалаз Рашьыҭ ӷьеҩ иқыжә аԥылгыды уара иутәуп!

📸 Асахьақәа иахьатәиқәоуп

🧡 Ахьыуардын шәақәтәа