سورو سیزدن، جواب «ایشیق»دان
 
شهریور آیی‌نین اون‌ایکیسینده قارداش «ایشیق سایتی»نین 15 یاشی تماملاناجاق.
مجازی صحیفه‌لریمیزده چوخ آزاراق صحیفه تاپاریق بو ایستقامتده اولا؛ توتدوغو یولا وفالی قالا؛ یولو آزمایا؛ شخصی آمال- ایدئال‌لارین دالینجا اولمایا؛ رئکلاما، گلیره فیکیرلشمه‌یه؛ یالنیز و یالنیز ادبیاتیمیزین خدمتینده اولا .
قارداش «ایشیق سایتی» 15 ایلدیر بیرآن دا دایانمادان، دورمادان بو آغیر وظیفه‌نی داشییر و بو گونه‌دک ادبیاتیمیزین اینکشافیندا بؤیوک آددیملار آتیب. گونده‌لیک مجازی خدمتلردن علاوه، «ایشیق» عایله‌سینین ان ده‌یرلی و قالارقی ایشلریندن بیری ده اوچ آیلیق «ایشیق درگیسی»نی دؤرد نومرده گئنیش مقیاسدا نشر ائدیب، اوخوجولارینا، سئونلرینه چاتدیرماغی‌ایدی. تاسفله چوخ تئز بو ده‌یرلی درگینین نشری دایاندیریلدی.
قارداش «ایشیق سایتی»نین 15 یاشینی قید ائتمکله، «ادبیات سئونلر گروهو» اولاراق، ایسته‌ییریک «ایشیق» - آذربایجان ادبیات و اینجه‌صنعت سایتی- ایله گئنیش بیر دانیشیق آپاراق. بو دانیشیغین سورغو سورانلاری سیز ادبیات سئونلرسیز. سیز سایین قوروپداشلاریمیز،کانالداشلاریمیز و دیگر ادبیات عایله‌لرینین حؤرمتلی عضولریندن بو ایشه قاتیلماغینیزی تکلیف ائدیریک. بو دانیشیغین سورولاری سیزدن و جوابلاری ایسه «ایشیق سایتی»ندان اولاجاق. سورولارینیزی گروهوموزدا دا پایلاشا بیلرسیز؛ شخصی ده گؤندره بیلرسیز؛ بلاواسطه «ایشیق» سایتینا دا چاتدیرا بیلرسیز.
بیرینجی سورو «ادبیات سئونلر»دن اولسون:
س: عزیز دوستلار! 15 یاشیندا اولماغینیزی صمیم قلبدن تبریک ائدیریک، چوخ موبارکدی ، اوغورلارینیز بول اولسون. لوطفن ایمکان دایره‌سینده «ایشیق» درگیسی‌ نشرینین دایانما سببلرینی آچیقلایین؛ و بیر ده بویورون، «ایشیق درگیسی» بیر داها دا بیزیم ائولریمیزه قوناق اولاجاق، یوخسا یوخ؟

ادبیات سئونلر 1405/5/28

https://t.me/Adabiyyatsevanlar