فَلَک  

رسول جوادی

فلک اَللرینده قونچا گتیردی
آپاراندا آنجاق، بیرگول آپاردی
قارغالاری ییغدی توکدو باشیما
گئدنده اوزون نن، بولبول آپاردی

بو مزره دن منه، قیلچیق، وئردی پای
دئدی اوتور گونله ریوی، یاخشی سای
اوزو آپاراندا، آپاردی تای-تای
دَریز-دریز باغلی سونبول آپاردی

توکدو یاغیشلاری، یازی-هم یایی
سئلین - سویون هئچ اولمادی بیر سایی
چیرماندیم کی منده کئچیم او چایی
تَنیکه قاب کیمی، یونگول آپاردی

ناغیل دئدی قاتدی منیم باشیمی
آپاردی یانیمدان یار- یولداشیمی
ایسته دیکی، آتسین منیم داشیمی
ائله بیل شنگول و منگول آپاردی

هشتاد ایل-دوخسان ایل یاشییان آدام
دئییر تئزدی، هله یاشامالیام
اولار نَجور گئتدی ؟، ایسته سن سایام
اولاریدا، دَنگول- دونگول-آپاردی

https://t.me/Adabiyyatsevanlar