رقیه-عبدیلی (سازاق)
من‌می یاراتمیشام بئله دونیانی؟
دونیا اودا دؤنوب هانی یانانی؟
نه رعیتی قانیر، نه ده کی خانی
یئییرده به دئییر، یئمیرده به‌دی
دونیا اگریدیرسه گناه منده‌دی؟
حیاتین ائنیدیر بویوندان اوزون
دادمادییب الیمدن دوزلوگون دوزون
ندیر گؤستردیگین بوروز بوروزون
دانیشسان بیلرم درد- چوْرون ندی
دونیا اگریدیرسه گناه منده‌دی؟
بیر اوجو بوردادیر، بیر اوجو اوردا
بیر آیاغی بورداْ بیریسه گوْردا
ایشی نانکورلوقدو بو ائله، یوردا
بیلینمیر دینسیزدی یا دا دین‌ده‌دی
دونیا اگریدیرسه گناه منده‌دی؟
نه دئمک ایسته‌ییر اؤزو ده بیلمیر
نه آغلیر آغلایام، نده‌کی گولمور
گؤردوگو ایشلردن ارییب اؤلمور
سانیرام عاغیلین وئریب جین‌ده‌دی
دونیا اگریدیرسه گناه منده‌دی؟
هر گون بیر وارلیق‌دی یوخ اولماقدادی
یوخلارین یوکسه‌لیر یئرسیزجه آدی
پیسه چیخماق آدی قورددا قایدادی
تولکو باشین چکیب اودور نین‌ده‌دی
دونیا اگریدیرسه گناه منده‌دی؟
هر یؤنه یاخیریق بیری یان گئدیر
قانمیر! دئییر قانین، اؤزو قان گئدیر
عؤموردور (سازاغیم) گون قاپان گئدیر
بوش وئر دوشونن‌لر بیری مین‌ده‌دی
دونیا اگریدیرسه گناه منده دی.
https://t.me/Adabiyyatsevanlar
Post #30977
156