اوشاق ادبیاتی
۷
سئحیرلی اوزوک 
یئددینجی ناغیل :
 « ننه نین سئوینجی »
یازان : علی صمدلی
کؤچورن : علی آغ گونئيلی  ــ  ابرازی
کتاب :‌ ژنرالین اوشاقلیغی ) پووئست لر بؤلومو)

ننه نئچه گون ایدی کی ، انتظاردا ایدی . گؤزلری یول چکیردی . احمد دن ، کریم دن وسلیم دن بیر خبر گؤزله ییردی . بیردن حیطده کی توت آغاجینا بیر ساغساغان قوندو . اونون سسی ننه نی فیکیردن آییردی . ساغساغان بوداقدا اوچ دفعه یئرینی دَییشدی . ننه اونون آردینجا باخاراق دئدی : 
ــ خئییر خبر اولاسان ، آ ساغساغان . یوخسا بالالاریم یول گلیر ، اونلاردان شاد خبر گتیرمیسن ؟
ايله بیل ساغساغان دوغرودان دا ننه یه خبر گتیرمیشدی . گون گون اورتادان اییلیردی . ننه الچیمینی اییریب یئنیجه قورتارمیشدی . جهره سینی گؤتوروب ائوه آپاریردی کی، بیردن اوشاقلارین شن ماهنیسی ائشیدیلدی . اونلار بیر – بیرینین آردینجا حیطه دولوشدولار . هامیدان بیرینجی اولاراق احمد قوللارینی آچاراق ننه سینی قوجاقلاییب اؤپدو. ننه کریمی و سلیمی ده باغرینا باسدی . 
ــ  خوش گلمیسینیز ، بالالاریم . گؤزوم یولدا ، قولاغیم سسده قالمیشدی . 
احمد دئدی : 
ــ ننه جان ، بو گون شادلیق گونو، بایرام گونودور. آغ دیوی محو ايدیب اونون بوتون طیلسیم لرینه صاحیب اولموشوق . باخ ، بو سنین سئحیرلی خالچان ، بودا منیم سئحیرلی اوزویوم ! 
ــ آی بالا ، گؤروم سیزی مین بوداق اولاسینیز . بس بو گؤزه ل قیز کیمدیر؟ 
احمد دئدی : 
ــ ننه ، جیم – سیم شاهین قیزی شاهانه دیر !آغ دیو اونو قاچیردیب طیلسیمه سالمیشدی . اونو بیز خیلاص ائتمیشیک . 
ننه تلاشلا دئدی : 
ــ آی اوغول ، آماندیر ، شاه قیزینی تئز سارایا چاتدیرین . گلیب بوردا گؤرسلر شاهین آداملاری سیزه خطا یئتیره ر .
ننه اوزونو شاهانه یه  توتاراق سؤزونه داوام ائتدی : 
ــ  منیم بالام ، آماندیر بیزی خاطایا سالارسان . بو ساعات آتانین سارایینا گئت . 
شاهانه دینمه دی. احمد دئدی : 
ــ  ننه جان ، شاهانه  بورادان هئچ یانا گئدن دئییل . او ، بیزیمله قالماق ایسته ییر .
آی اوغول ، کاسیب کومامیز شاه قیزینا لایق دئییل . آتالار دئییب کی ، هر کس آیاغینی یورغانینا گؤره اوزاتمالی دیر . 
احمد دئدی : 
ــ ننه جان ، هر نه یین فیکیرینی چکمه . الیمده ائله بیر قووه وار کی ، بیر گؤز قیرپیمیندا  سیم – سین شاهین ساراییندان گؤزه ل سارای تیکدیره رم . باخ ، بوتون طیلسیملر بو اوزوکده دیر ! 
احمد اوزویون توزونو سیلدی . قارا اجینه اونون قارشیسیندا باش ایرک دئدی : 
تولکو ، تولکو قویروغوم، 
ندیر منه بویروغون ؟ 
احمد : ننه جان ، اوره یین نئجه سارای ایسته ییر ، سؤیله ! 
احمد ننه سینی نقدر سسلدیسه ده ننه دن جاواب چسخمادی . سن دئمه ننه قارا اجینه دن قورخوب دانیشمیر .
احمد آمرانه بیر سسله طیلسیمین سؤزلرینی سؤیلمه یه باشلادی : 
فیل – فیلی ، فیلین ، فیلی، 
دول ـ  دولو ، دولون ، دولو ،  
گول ـ گولو ، گولون ، گولو ، 
بیل ـ بیلی ، بیلین ، بیلی!
ــ بو ساعات بورادا بیر داشی قیزیلدان ، بیر داشی گوموشدن سارای ایسته ییره م! 
قارا اجیننه  او دقیقه یوخ اولدو. گؤی گورولدادی ، ایلدیریم چاخدی . بیر گؤز قیرپیمیندا بیر داشی قیزیل ، بیر داشی گوموش سارای حاضیر اولدو . احمد شاهانه نین قولوندان توتوب پیلله لره طرف گئتمک ایسته ییردی کی ، گؤردو لباسلاری سارایا یاراشمیر . اوزونون توزونو سیلیب قارا اجیننه یه امر ائتدی : 
ــ  منه  شاهلارا لاییق ، شاهانه یه شاه قیزینا ، ننمه ایسه شاه آنالارینا لاییق لباس حاضیر ائت ! 
یئنیدن گؤی گورولداییب ، ایلدیریم چاخدی احمدین بو آرزوسودا بیر گؤز قیرپیمیندا یئرینه یئتدی . اونلار گئیینیب ـ کئجینیب سارایا داخیل اولدولار .سارای چوخ دبدبه لی ایدی . اونون ائوینین بیری گون باتانا ، او بیری ایسه گون دوغانا ایدی . ایری و ایشیقلی پنجره لردن آسیلان زر پرده لر آدامین گؤزلرینی قاماشدیریردی . یئمک اوتاغی ، یاتاق اوتاغی ، استراحت اوتاغی ... حاضیر سوفره یه ایلشدیلر . سوفره ده قوش سودو ، جان درمانی ، نه ایسته سن وارایدی . 
احمد دبدبه لی زنگین لییی گؤروب کریم و سلیمی اونوتموشدو... 
کریم له سلیم احمدین اوول کی کاسیب کوماسیندا قالمیشدیلار . بونلار بورادا قالسینلار سیزه کیمدن خبر وئرک ، کوپه گیرن قاریدان .

https://t.me/Adabiyyatsevanlar