اؤنجه‌لر ائودن، بیتیب-توکنمه‌ین داوالاردان سیخیلیردیم، آمما آرتیق اؤزو‌مه مشغولّیت تاپمیشدیم، داها اؤولکی کیمی دئییلدیم.

مای آیینین ۱۲-سی ایدی.

صینیف اوتاقلاری آرتیق خئیلی ایستی و (نفس آلماق چتین اولان) بوغوجو ایدی.

آمما موسی هله ده گؤدکجه‌نی چیخارمامیشدی.

الهام هامییا موسانین بدنین‌ده یارالار اولدوغونو دئمیشدی. اوشاقلار دا الهامین دئدیکلرینه اینانیب اوندان داها دا اوزاق گزمه‌یه چالیشیردیلار.

همین گون الهام صینیفه گیریب موسایا یاخینلاشدی.

— دور آیاغا، بورادا من اوتوراجام، — دئدی.

موسی دینمزجه اوزونو یانا چئویردی. یئریندن ده قالخمادی.

الهام اونا باغیرماغا باشلایاندا من آرتیق هیرسیمدن تیتره‌ییردیم.

— اونون یئری دیر، سن نییه اوتورورسان؟ — من ساکیت سسله دئدیم.

— سن نییه قاریشیرسان؟

— موسانین یئرینده اوتورما، بدنی یارادیر، سنه ده کئچر، — من کنایه ایله گولوب دوز الهامین گؤزونون ایچینه باخدیم.

صینیفه ساکیتلیک چؤکموشدو، هامی اونون نه ائده‌جه‌یینی گؤزلەییردی.

اونو پیس دوروما سالمیشدیم.

الهام (پوفله‌یب) دؤیونوب اطرافا باخدی، سونرا ساکیتجه یئرینه کئچدی.

آمما من اونون اوزونده‌کی ایفاده‌نی گؤردوم.

منه توخونا بیلمزدی. آنلادیم کی، موسایا نسه بیر تله قوراجاق.
14

سحر، دوشوندویوم کیمی اولدو. صینیفین قاپیسی قیریلدی و صینیفده هامی قاپینی موسانین قیردیغینی دئدی. تکجه من موسانین قیرمادیغینی دئییب ساکیتجه سئودا معلمه‌یه باخدیم. الهامین آناسی دا صینیفده ایدی.

— موسی، گل لوحه‌یه.

موسی دینمزجه قالخیب ایره‌لی کئچدی. اوزو سولغون و دورغون ایدی. قوروموش، قاپقارا دوداقلاری بیر-بیرینه سیخیلمیشدی. اوزو او قدر آریق ایدی کی، ائله بیل دریسینی سومویونه چکمیشدیلر.

— بونون بدنی ده یارادیر، گؤدکجه‌نی ده اونا گؤره چیخارمیر. اوشاقلارا کئچسه، نئجه اولاجاق؟ — الهامین آناسی پروانه دیللندی.

من نفرتله اونو سوزوب دیشلریمی سیخدیم. پروانه منیم باخیشلاریمی یاخالاییب عئینی نیفرتله منی ده سوزدو.

— سن نییه چیخارمیرسان بو گؤدکجه‌نی؟

سئودا معلمه الینده‌کی دفترله موسانین باشینا ووردو. الهام هیریلدادی، اونون آردینجا باشقا اوشاقلار دا گولدولر.

او آن من اونلارین هامیسینا نفرت ائدیردیم.

— قاپینی نییه قیرمیسان؟ صاباح آتان گلسین، پولونو وئریب دوزلتدیرسین. — سئودا معلمه غضبلە دیللندی.

الهام باش وئرنلری بؤیوک راضیلیق وممنونیّتله سئیر ائدیردی.

— قاپینی موسی قیرماییب. الهام قیریب.

آیاغا دوروب دوز پروانه‌نین اوزونه باخدیم.

— الهام قیریب.

بو دفعه ده سئودا معلمه‌یه (قورخماییب قارشی دوردوم) میدان اؤخودوم.

— سن... سن الهاما شَر آتیرسان!

پروانه آزجا ایره‌لی یورودو. سئودا معلمه اونون قولوندان توتوب ساخلادی.

— پروانه خانیم، ساکیت اولون.

من قورخموردوم. سئودا معلمه‌نین، پروانه‌نین منه نسه ائده بیله‌جه‌ییندن قطعین ناراحات دئییلدیم.

آنامین یانیمدا اولماسی، موسانی مودافیعه ائده بیلمه‌ییمین غورورو منه گوج وئریردی.

پروانه‌نین ایییلمیش اوزونو، الهامین بومبوش گؤزلرینده‌کی ناراحاتیلیق، سئودا معلمه‌نین ایکیمیزین آراسیندا قالیب پوفله‌مه‌سینی دؤیونمه‌سینی گؤرمکدن حظ آلیر‌دیم.

دنیز اوزونو اووشدوروب باشینی آزجا گئری آتدی، گریلدی.

— یوخونوز گلمیر کی؟ — سوروشدو.

— یوخ، داوام ائدین.

— موسانین حیات حکایه‌سی سیزه ماراقلی گلدی، حتی منیم حکایه‌مدن ده.

— یوخ، سیزین حکایه‌نیز ده ماراقلیدیر، — (اوتاندیم) پرت اولموشدوم.

— اصلین‌ده، هئچ بیری تک‌لیکده ماراقلی دئییل. بیلیرسیزمی، نییه؟ چونکی بونلار بو شهرین هر مکتبینده، هر ائوینده یاشانان عادی حادثه‌لردیر.

ساده‌جه، هر کس اؤز حکایه‌سینین باشقالارینکیندان فرقلی،  باشقالاریندان خوصوصی اولدوغونا اینانیر.

— یوخ، اصلین‌ده فرقلیدیر ده، — بو، صمیمی فیکریم ایدی.

— نئجه؟

— حیات حکایه‌لرینی فرقلی ائدن، او حکایه‌لری یاشایانلارین فرقلی یاناشمالاری، فرقلی نتیجه‌لر چیخارمالاری‌دیر. بیر حیکایه‌نین ایشتیراکچیسی اولان یوزلرله اینسان اورادان تام فرقلی کیملیک‌لرله، سئچیم‌لرله چیخیر. بیری ساغلام، او بیری خسته، یا دا بیری گوجلو...
15
آردی وار
https://t.me/Adabiyyatsevanlar