ائوده گئتدیکجه داها چوخ دوا-دالاش اولماغا باشلامیشدی. بعضن آنام یاتاق اوتاغیندا یوخ، سالوندا یاتیردی. اونلارین آراسیندا سببی‌نی هله تام بیلمه‌دیییم نه‌لرسه باش وئریردی.
یئنی درس ایلی باشلامیشدی. آتام منی مکتبدن گوتورمه‌لی ایدی. بینادان چیخاندا گؤردوم کی، آتام ماشینین یانیندا دایانیب منی گؤزلَه‌ییردی. آمما اونا ساری گئتمه‌دیم.
— بیلیرسیز نییه؟
چونکی آتامین گؤزلرینده‌کی ییرتیجی پاریلتینی گؤرموشدوم. ماشینا سؤیکه‌نیب یوخاری صینیف شاگیردی اولان قیزلارا ائله ایشتاهلا باخیردی کی، اوره‌ییم بولاندی.
یوخ، دوشونمه‌یین کی، بو آتاما نفرتیمدن، اونا اوخشاماق قورخوسوندان یارانان خیالی شئی‌لردی. من نه گؤردویومو بیلیردیم.
12
صینیفده اوخویان اوغلانلارین گؤزلرینده‌کی‌نین عئینیسیدی بو پاریلتی.
چانتامی چیینیمدن آشیریب سورعتله قاچدیم، آتاما چاتیب اونون قارشیسیندا دایاندیم. منی گؤرن کیمی ماشینا ائیلشدی.
آرخادان گوزگوده اونون باخیشلارینی یاخالاماغا چالیشدیم.
— او قیزلار منیمله یاشیددیرلار، — دئدیم.
— بوش-بوش دانیشما، آنان کیمی باشلاما سن ده، — آتام غضبلە دیللندی. ساغ دوداغینین یئنه آشاغی دارتیلدیغینی، اوزونده او واخت منه آنلاشیلماز اولان بیر ممنونیّت سئزدیم.
سونرا آتامین آناما خیانت ائتدییینی اؤیرندیم.
— صینیفده نسه اولدوغونو دئدینیز بیر آز اوّل، او نه ایدی؟ — من عادى، خاص اولمایان بیر خیانت حکایه‌سی دینلمه‌یه هوسیم اولمادیغینی حیس ائتدیرمک ایسته‌دیم.
دنیز ویسکی‌دن بیر قورتوم دا ایچیب منه باخدی.
— بلکه بیر قهوه ایچک؟
راضیلیقلا باشیمی یئلله‌دیم. آچیغی، نسه‌یه اعتراض ائتمه‌یه هوسیم ده یوخ ایدی. شرابین سون اودومونو آلیب قدحی ماسایا یاخینلاشان گارسونا طرف ایتله‌دیم.
— هه، صینیفده... او ایل صینیفیمیزه موسی آدلی بیر اوغلان گلدی. آریق، اوجابوی، همیشه عئینی پالتارلار گئیینن، هاوا ایستی اولاندا دا اَینینده‌کی دری گؤدکجه‌نی چیخارمایان، سس‌سیز، کیمسه‌یه قاریشمایان بیری ایدی.
صینیفه گلر-گلمز حاققیندا موختلف معلوماتلار چاتدی قولاغیمیزا. اونو باشقا بیر مکتبدن قووموشدولار، بورا ایلین اورتاسیندا گلمیشدی.
او اؤزو حاققیندا هئچ کیمه هئچ نه دانیشمادیغینا گؤره، دئییلنلر ائله حقیقت کیمی قبول ائدیلمه‌یه باشلادی.
من او واخت سوسقون، آداما یاووشماز بیری ایدیم. دئدیم سیزه، سوسماغی اؤیرنمه‌یه باشلامیشدیم. صینیفده کؤلگه کیمی دولاشیردیم.
بیزه موسانین تربیه‌سیز، آدام اولمایاجاق بیری اولدوغونو دئمیشدیلر. بو «آدام اولماق» ین نه دئمک اولدوغونو بیلیرسیز ده، یقین. بورادا اوخوموسوز اورتا مکتبی؟
من باشیمی ترپه‌دیب قهوه‌دن بیر اودوم ایچدیم. بورادا یاشامادیغیمی هاردان بیلدییینی سوروشمادیم.
— موسی «آدام اولماق» معیارلارینا اویغون دئییلدی. اوست-باشیندان گؤرونن او ایدی کی، کاسیب عائیله‌دندیر، اوسته‌لیک، درس‌لری ده اوخوموردو. دئمک کی، اوندان «آدام اولمایاجاقدی.»
یعنی موسانین دامغالاری، اوستونه یاپیشدیریلان منفی آدلاری واردی و صینیفده هامی اونا دوشمن کسیلمیشدی.
یوخ، هر گون دؤیولموردو. آمما کنایه‌لر، لاغا قویمالار، ایدمان درسینده اونو اویونلارا بوراخمامالاری، اَینیندن چیخارمادیغی دری گؤدکجه‌سینی دارتیشدیریب دیش آغارتمالار اولوردو.
بیلیرسیز، اورتا مکتبده، خصوصن یوخاری صینیفلرده اوشاقلار چوخ رحمسیز اولورلار.
13
یاز گلمیشدی. پنجره‌نی آچان کیمی ایچری آخان گونش شعاعلاری سویوق صینیف اوتاقلاری‌نی ایسیتمیشدی. آمما موسی یئنه ده اوستو جیزیقلی دری گؤدکجه‌ده گلیب-گئدیردی.
او اَن آرخا پارتادا اوتوروردو، یئنه هئچ کیمسه‌یه قایناشیب-قاریشمیردی و بیز اونون حتی سسی‌نین ده نئجه اولدوغونو بیلمیردیک.
الهام آدلی صینیف یولداشیمیز بیر قوروپ اوغلانین باشچیسی ایدی. من او کوماندا‌دا دئییلدیم. عمومییتله، هئچ بیر کوماندا‌دا دئییلدیم.
الهام منیمله، دئمک اولار کی، دانیشمیردی. آمما موسایا دائماً سؤز آتیردی.
صینیفیمیزده اَن وارلی عائیله‌دن اولان او ایدی. آناسی تئز-تئز مکتبه گلیردی. صینیف رهبریمیز سئودا معلیمه‌یه قوشولوب آز قالا هامییا تعلیماتلار وئریردی.
من همن آنلاردا سئودا معلمه‌دن اییره نیردیم، چونکی الهام‌گیلین پولونا (تاماح سالدیغینی) شیرینلندییینی حیس ائدیردیم.
منیم آنام هئچ واخت معلم‌لره هدیه، پول گؤندرمزدی.
«بیز آلوئرده ایشتیراک ائتمه‌یه‌جَه‌ییک.» — آنام هله بیرینجی صینیفده منی مکتبه یازدیراندا مودیره بئله دئمیشدی.
اوندا بیلمیردیم مکتبده آل-وئر نئجه اولور. سونرالار اؤیرنمه‌یه باشلادیم، آمما هئچ واخت ایشتیراک ائتمه‌دیم.
آنامین مودیره دئدییی سؤزلر، من صینیفدن صینیفه کئچدیکجه معلم‌لریمه ده چاتیردی.
درس ایلینین سونو ایدی. آچیغی، من درس‌لر، نهایت کی، بیته‌جک دئیه چوخ خوشبخت ایدیم.
Post #30678
289