پیچیلتی(حیکایه)
یازان :زومرود یاغمور
کوچورن :سحر خیاوی
اوچونجو بولوم
— یوخ ائی، نه دانیشیرسان، ائله شی اولار؟ گنجلیک‌ده‌یم، منیم ائله آداملارلا نه ایشیم اولا بیلر، منی بیلیرسن، — دئییب راحاتجا آللاها آند ایچدی. آنام بعضن نسه‌یه شوبهه ایله یاناشاندا «کافیرسن» دئییب اونو گوناهلاندیران آتام، ایندی یالاندان آند ایچیب دوستونو آلداتمیشدی.
ائوه گلیب آناما اولانلاری دانیشدیم. منیمله یاناشی اوتوروب الینده‌کی دستمالین گوللرینی سیغاللاماغا باشلادی.
— باخ، دنیز، آتانین نییه ائله دئدییینی بیلمیریك. آمما سن یالان دانیشما. سنی اودار، باتاقلیق کیمی...
— آمما آتام دئدییی یالانلارا اؤزو ده اینانیر. بو حاقدا اوخوموشام. آتام خسته‌دیر، ساغلام اینسانلار بئله اولمور. دئییم، آتامین دوکتور تشخیصی نه‌دیر؟
— نه‌دیر، نارسیت؟ سون واختلار کیمی، دئییرسن فیلان‌کس نارسیت‌دیر— آنام گولومسه‌ییب ساچلاریمدان اؤپدو.
— سن پسیخولوق دئییل‌سن، — آنام دیقّتله اوزومه باخدی. — من سنین یالانچی اولماغینی ایسته‌میرم. اینان منه، یالان دانیشمادان دا یاشاماق اولور، من یاشاییرام، مثلاً.
— یالان دانیشمیرسان، آمما یالانا اینانیرسان.
آنام خئیلی سوسدو، سونرا دیقّتله اوزومه باخیب:
— یالان دانیشانین قارشیسیندا سوسماق اینانماق دئییل، یالان دانیشانی آلداتماقدی. فرقی باشا دوشورسن؟
من باشیمی بوللاییب «یوخ» دئدیم.
— چونکی سنی آلداتدیغینی دوشونوب اؤزو آلدانیر.
آنامین اوزو یورغون و غوصصه‌لی ایدی.
آرتیق مکتبه آوتوبوسلا گئتمیردیم. آتام ماشین آلمیشدی و بو منیم حیاتیمی خئیلی یونگوللشدیریمیشدی. دوققوزونجو صینیفده اوخویوردوم. گله‌جکله باغلی آیدین پلانلاریم واردی. گولمکده حاقلیسیز، بو یاشدا گله‌جکله باغلی نه پلان اولا بیلر؟ آمما اَن بؤیوک پلانیم حاضیر ایدی: ائودن گئتمک.
هر شئیدن، هر کسدن، آتامین داواملی «یاخشی آدام» ماسکاسی‌نین آلتینداکی آدامی ایفشا ائتمک احتیراسی‌نین ایچیمده یاراتدیغی خسته هیککه‌دن ساغالا بیلمک، آنامین اوزونتودن چؤکموش گؤزلرینی گؤرمه‌مک اوچون گئتمک — پلانیم بو ایدی.
منه پیس اؤولاد دا دئیه‌جکلر، ظالیم آدام دا، آمما بونلارین هئچ بیری وئجیمه دئییلدی.
بیلگی‌لره آج ایدیم، هر شئیی اؤیرنمک ایسته‌ییردیم. نَه‌ایسه آنامدان سوروشاندا بیلدییینی دئییر، بیلمه‌دییینی ده «آراشدیر، منه ده دئیرسن» دئییب منی داها دا هوسلندیریردی.
بیر گون ده آنامدان هوموسکسواللار حاقدا سوروشدوم.
— بیزده اونلارا لعنته گلمیش اینسان دئییرلر، آمما من سووئت تربیه‌سی گؤرموش...
11
آدامام، — گولومسه‌دی. اؤیره‌نه‌جکلریمـی اونونلا دا پایلاشمامی ایسته‌دی. آنامین بو کیفیّتی‌نی چوخ سئویردیم. آتام بئله دئییلدی، ائله بیلیردی کی، اَن دوغرو اونون بیلدییی دیر، اَن کیچیک مسئله‌ده ده گوذشته گئتمیردی، موباحثه ائدیردی. او گون ده آتام آناملا صحبتیمیزی ائشیدیب یئنه موباحیثه‌یه باشلادی. منی جهنّمده یانماقلا قورخودوب آنامین منی پوزدوغونو دئیه‌نده آنام همیشه‌کی کیمی منی قورودو.
— جهنّمده یانماق نه دئمکدیر، سن نه دئدییی‌نین فرقینده‌سن؟
— بئله دئیه-دئیه بونو پوزاجاقسان، آخیر‌دا آوارا و کافیر بیری اولوب چیخاجاق باشیمیزا...
آتام بیچاغی بوشقابا اله چیرپدی کی، من قورخومدان دیرناقلاریمی بودلاریما سیخدیم.
— بیلیرسن سن نه‌سن؟ ابلیسن، قصدن سالدین هه بو صحبتی. راضی قالدین ائتدیییندن؟ سنی ائله تانیییرام...
آتام گؤزلرینی قیییب اوزومه باخاندا ائله بیل دوغرودان دا دونیانین اَن موردار آدامی، حتی ابلیس ده اولدوغوما ایناندیم.
بعضن مکتبدن قاییداندا آتام چوخ احتیاطلا منی آناما قارشی دولدورماغا چالیشیردی. هر دفعه ده عئینی سؤزلری تکرار ائدیردی.
«سنی بیلیرم، منیم اوغلومسان، منه اوخشایییرسان» دئییب پاریلدایان گؤزلری ایله ماشینین گوزگوسوندن منه باخاندا قورخوردوم.
او سحر ده منه «ابلیس» دئیه‌نده عمللیجه قورخموشدوم و او گوندن سونرا هئچ واخت آتامین بیر گون دَییشیب یاخشی آدام اولا بیله‌جه‌یینه اؤزومو ایناندیرماغا چالیشمادیم.
— بیلیرسیز نه باش وئردی؟
— نه؟ — دانیشدیقلاری گئتدیکجه داها چوخ دیقّتمی چکیردی.
— من سوسماغی اؤیرندیم. تصور ائدین، عمللیجه بونون اوچون مشق ائدیردیم. ائوده داوا دوشن کیمی من اوتاغیمین قاپیسینی اؤرتمه‌دن چارپاییمدا اوتوروب، قولاقلیقلاری تاخیب موسیقی دینله‌یه-دینله‌یه آتامین آنامی دؤیمه‌سینی، حدقه‌دن چیخان گؤزلرینی سس‌سیز بیر فیلم کیمی ایزله‌ییردیم.
او زامان ژاپن موغنّیلرینی دینله‌ییردیم. ساکورایی‌نین قورو، سرت سسی قولاغیمدان کئچیب قانیما یاییلیردی و باخدیغیم سس‌سیز فیلم ایله دینله‌دیییم موسیقی آراسیندا باغلانتی قوروب باشقا بیر سناریو یازیردیم ائله بیل.
آمما آز سونرا بو، آناملا دا آرامدا قالین بیر دیوار هؤرمه‌یه باشلادی.
Post #30677
272