پاییز نوت‌لاری - علیزاده نوری


کوچورن : رحیم گوزل



هردن اوخویورام مکتوب‌لارینی-
یولونو تاپمیشام دیری قالماغین.

***

هارداسا اوزاقدا کامان آغلاییر-
بلکه بیر نغمه‌نی گولله‌‌له‌ییرلر؟!
***


اوره‌یینی قالین گئیین-
چولده آیریلیق اسیر.


***
بنووشه بوینونو ائله بوکوب کی،
ائله بیل اونون دا آتاسی یوخدو.


***
یوخوسوندا آزادلیغینی گوروردو
چرچیوه‌یه سالینمیش شکیل.

***

وطن، باشینی دیک توت،
قوی چکیم شکیلینی.

***


یاغیش نه بیله‌یدی کی
چولون چتیری یوخدو؟
***


ائله بوله‌سن کی دنی قوش‌لارا
قوش‌لار دا دانیشا عدالتیندن.



***
دونیا، ائشیدیرسن‌می
او اوشاغین گوز یاشی‌نین سسینی؟!

***


هامی قوناقدی دونیادا،
هامی قوناقلیقدا دئییل.

***

شهید مزارلاری ایله برکیتدیک کی،
ییخیلماسین بو وطن.


***
بیر قدح خاطیره‌دن
سرخوش اولماق اولورموش.


***
قومرو قوشو ائله اوخویوردو کی،
ائله بیل آغلاییردی.
قومرو ننه‌م ائله آغلاییردی کی،
ائله بیل اوخویوردو.


***
اوجا داغلارا باخدیق کی،
بویوموز دا بویوسون.


***
باشین اوسته گوی اوزو وار!-
باشیندان آرخایین اول.

https://t.me/Adabiyyatsevanlar