Қарағандыда студенттерге жоқ пәтерлерді жалға берген алаяқ әйел ұсталды

Қарағанды қаласында әлеуметтік желілер арқылы студенттерді алдап келген 31 жастағы әйел құрықталды. Күдікті интернеттен алынған пәтер фотосуреттерін арзан бағамен жарнамалап, баспана іздеген жастардан алдын ала төлем алып отырған. Ақша түскен соң байланысын үзіп, уәде етілген баспананы бермеген. Полиция қызметкерлері жүргізген жедел шаралар нәтижесінде күдіктінің алаяқтыққа қатысты 10 дерегі дәлелденді. Жәбірленуші студенттерге келтірілген шығын көлемі 2,2 миллион теңгеден асты. Қазіргі уақытта бұл факт бойынша сотқа дейінгі тергеу амалдары жүргізілуде.