Алматының Бостандық ауданын көркейтуге 3 млрд теңгеден астам жеке инвестиция тартылды

Алматының Бостандық ауданында «Игілік Бостандық» жобасы аясында жалпы құны 3 млрд теңгеден асатын 26 көркейту жобасы жүзеге асырылып жатыр. Қаражат қала бюджетінен бөлінбей, бизнес өкілдерінен тартылған. Бұл туралы Бостандық ауданы әкімдігінің өкілдері айтты.

Қазіргі таңда жалпы құны 792,3 млн теңге болатын 11 жоба аяқталды. Құны шамамен 2 млрд теңге болатын тағы 13 нысанда жұмыстар аяқталуға жақын.

Аяқталған жобалардың қатарында әл-Фараби даңғылындағы бес жерүсті жүргінші өткелін жөндеу, Розыбакиев көшесіндегі тұрғын үйдің қасбетін жаңарту, Дулати көшесіндегі скверді көркейту, Абай және әл-Фараби даңғылдарын көгалдандыру, ірі жолайырықтарына жаңа жарықтандыру бағаналарын орнату бар.

Сондай-ақ тұрғын үйлердің шатыры жөнделіп, жүргіншілерге арналған аумақтар көркейтілді және «Шапағат» орталығының жанынан инклюзивті алаң салынды.

Жалпы Бостандық ауданына 34,5 млрд теңгеден астам инвестиция тартылды. Оның ішінде 3 млрд теңгеден астам қаражат аудан әкімдігі тарапынан «Игілік Бостандық» жобаларын іске асыруға тартылған.