Аерган булса да бераз
Араны кайбер заман...
Тынгысыз, туры юлыбыз
Ил белән бергә һаман.

Сер итеп кенә дигәндәй,
Сиңа да әйтим микән?
Алтмышның аргы ягы да,
Билләһи, ямьле икән.

Бигрәк тә, безнең хәзерге,
Кояшлы, аяз дәвер
Шулкадәр әйбәт, күңелле! —
Яз гына инде хәзер.

Нәрсәдер сизгән сыман, син
Елмаеп йөри идең;
Шул чакны көткән, күрәсең,
Синең бу юбилеең.

Һәм бүген килсә дә Тукай,
Сәхнәгә чыкса иде:
Нәрсәдер әйтер дә сиңа,
Кулыңны кысар иде...

Хөрмәтли сине Туган ил.
Ә ул юк, ялгышмый бит:
Иҗатта гына түгел, син
Һәркайда намуслы бит!