Аԥсны атәылауаа рзинқәа рыхьчара азҵаарақәа рзы Урыстәылеи ҳареи ҳаиҿцәажәарақәа ирыцаҳҵоит, абас аҳәамҭа ҟаиҵеит АдәА рминистр Олег Барцыц, атәыла ахада Бадра Гәынбеи иареи реиԥылараан.
Урыстәыла адәныҟатәи аусқәа рминистр Сергеи Лаврови Барцыци реиԥылараан излацәажәоз рхыԥхьаӡараҿы иҟан — урыстәылатәи аҵараиурҭақәа рҿы аҵара зҵо аԥсуа студентцәа арратә ҳасаббара рықәыргылареи, Аԥсны атәылауаа Урыстәыла аҵакыраҟны рыҟазаара аҿҳәара 180 мшы рҟынӡа аизырҳареи.
Иара убас аԥсуа ган ирҭахуп ареспублика атәылауаа ртәылауаҩшәҟәқәа рыла урыстәылатәи аҳәаа иахысларц азы азин аҟаҵара.
"Арҭ азҵаарақәа зегьы еилкааны иазыӡырҩит. Насгьы, ҳара иааиԥмырҟьаӡакәа ҳусура иацаҳҵоит", — ҳәа азгәеиҭеит Барцыц.
Post #21595
9