Аҳаирхыхьчаратә мчқәа русура иахҟьаны аҳәаахьчаратә ҭыԥ "Ԥсоу" аркра аамҭазы уа иҟоу атәылауаа ршәарҭарада азҵаара аҭыԥ иқәҵатәуп иҳәеит атәыла ахада Бадра Гәынба, Аҳәынҭқарратә шәарҭадаратә маҵзура ахантәаҩы Дмитри Дбари, АшәМ Аҳәаахьчаратә усбарҭа аиҳабы Рустам Латипови иареи реиԥылараан.

Аҳәынҭқарра ахада анапынҵа ҟаиҵеит, ас еиԥш аҭагылазаашьақәа раан ашәарҭадаратә ԥҟарақәа аус адулазарц, аҳәаа ахысра иахьымӡаз ауаа рзы аҭагылазаашьақәа азԥхьагәаҭазарц.

Иара убас, Гәынба адҵа ҟаиҵеит Аԥсны хазы игоу атәылауаа аҳәааҿы акраамҭатәи ргәаҭарақәа рзы аинформациа ҭырҵаарц.

"Сшәыҳәоит, урыстәылатәи шәколлегацәеи шәареи аусбарҭабжьаратә еинырра аҳәаақәа ирҭагӡаны иҟоу аинформациа ахьынӡаиашоу гәашәҭарц, иарбоу атәылауаа рыпроблемақәа зеиԥшроу шәахәаԥшырц", — ҳәа азгәеиҭеит иара.