Аԥсны иҟоу Урыстәыла ацҳаражәҳәаҩ Виачеслав Гладков Аҟәа ҳамҭас иаиҭаз ароиаль аӡынразы Аџьапуа ихьӡ зху Аҟәатәи аҟазара ашкол ахь ииаргоит.

Идырым асолдаҭ ибаҟа аҿаԥхьа иҟоу апарк аҿы имҩаԥысит ахадара акультура Аусбарҭеи аҳҭнықалақь аԥшаҳәеи апаркқәеи рдирекциеи еиҿыркааз аконцерт.

Аҟәа амшынԥшаҳәахьы ароиаль дырхынҳәуеит ааԥынразы, уа уи акәша-мыкәша иаԥҵахоит акультура-ԥсшьаратә усмҩаԥгатәқәа реиҿкаарҭа аҭыԥ.

Аԥшаҳәа адирекциа иазԥхьагәанаҭоит ароиаль адәахьтәи аныррақәа рацәыхьчаразы аргылара ҷыда аҟаҵара.

Идырым асолдаҭ ибаҟа аҿаԥхьа иҟоу аҵакыра — аҳҭнықалақь ауааԥсыреи асасцәеи здызыԥхьало, уаажәларратә ҭыԥуп ҳәа азгәеиҭеит ақалақь аԥшаҳәеи апаркқәеи рдирекциа анапхгаҩы Аинар Лабахәуа.