Кавказ ажәларқәа Рконфедерациа Апарламент уаанӡатәи ахантәаҩы Иусуп Сосланбеков 1994 шықәсазы ианашьаз Леон иорден иԥацәа ирырҭеит иахьа.

Турпал-Алии Иунус Сосланбекови аҳамҭа рнапаҿы идиркит аҳәынҭқарра ахада Бадра Гәынба.

Иара иазгәеиҭеит аԥсуа жәлар рзы иуадаҩыз ашықәсқәа раан Аԥсны ахақәиҭразы ақәԥараҿы адгылара ҟазҵаз ауаа ргәалашәара аиқәырхара шаҟа ихадоу.

"Ҳара ҳзы акраҵанакуеит зегь реиҳа ихьанҭаз ашықәсқәа рзы Аԥсны адгылара азҭаз, ҳажәлар ирыцхраауаз ргәалашәара. Иусуп Сосланбеков ус еиԥш иҟаз ауаа дыруаӡәкын. Хатәгәаԥхаралатәи ацхыраара аиҿкаараҿы иара илагала ахә ашьара уадаҩуп", — иҳәеит атәыла ахада.