Гәыԥ ақыҭан иҟоу VI ашәышықәсазтәи ажәытә уахәамаҿ Аӡыԥшьаратә ныҳәара мҩаԥыргеит шәышықәса рыҩнуҵҟа раԥхьаӡа акәны.

Ауахәама ԥшьан рашәара 29 рзы иулиантәи амзар ала иԥшьаз, агәаҟра здызкылаз Аԥхьатәқәа Пиотри Павели рыхьӡала, Аԥснытәи Аиашахаҵаратә Уахәама ахада изылԥхарала.

Уаанӡа ԥхынгәы 20 рзы Иԥшьоу Ацҳаражәҳәаҩцәа ргәалашәара Амш азгәарҭахьан Гәыма ақыҭа ауахәамаҿы аныҳәатә анцәаимҵаныҳәареи аӡыԥшьареи ала.

🖇 Гәыԥ ақыҭан игылоу VI ашәышықәсазтәи ажәытә уахәама рыцқьан апроект "Ажәытә ҭӡамцқәа рылԥха" аҳәаақәа ирҭагӡаны.

Апроект хықәкыс иамоуп мрагыларатәи Аԥсны игәыгәҭажьу ажәытә уахәамақәа ррыцқьареи реиҭашьақәыргылареи. Абардрақәа, агәамсам ықәыргоит, арбагақәеи аинформациатә стендқәеи ықәдыргылоит, анаҩс аԥшьаҭыԥқәа рахь аҳаџьратә маршрутқәа еиҿкаахоит.