У Вашынгтоне адміністрацыя Дональда Трампа пагражае знесці гістарычны Цэнтр выканальніцкіх мастацтваў імя Джона Кенэдзі, калі на фасадзе будынка не будзе высечана імя цяперашняга прэзідэнта ЗША.

Помнік мадэрнізму, адкрыты ў 1971 годзе рашэннем Кангрэса, стаў закладнікам эгацэнтрычнай палітыкі і дэвелаперскіх амбіцый. Пасля прыходу да ўлады Трамп распусціў апякунскую раду цэнтра і прызначыў лаяльных людзей, якія прагаласавалі за даданне яго імя ў назву. Калі федэральны суд прызнаў гэта незаконным і абавязаў дэмантаваць шыльду, улады перайшлі да прамога інфраструктурнага шантажу, зачыніўшы будынак нібыта на тэрміновы рамонт.

Юрысты Міністэрства юстыцыі ЗША афіцыйна заявілі ў судзе, што без асабістага «дэвелаперскага досведу» Трампа і яго здольнасці прыцягваць інвестыцыі будынак ператворыцца ў небяспечную руіну, якую давядзецца знесці, пабудаваўшы на яе месцы адкрыты амфітэатр. Трамп фактычна заблакаваў выдзеленыя Кангрэсам 257 мільёнаў долараў на рэканструкцыю, патрабуючы высечы ў мармуры пад назвай установы надпіс: «Адноўлена і адрэстаўравана прэзідэнтам Дональдам Дж. Трампам». Сітуацыя дайшла да абсурду: прэзідэнта заснялі ў самалёце з плакатам «Кенэдзі-цэнтр знесены», пасля чаго федэральны суддзя Крыстафер Купер быў вымушаны выдаць беспрэцэдэнтную пастанову, якая наўпрост забараняе знішчэнне будынка без 30-дзённага папярэдняга паведамлення суда.

Пагроза фізічнага знішчэння цэнтра — гэта не проста блеф. Раней Трамп ужо знёс Усходняе крыло Белага дома дзеля будаўніцтва бальнай залы за 600 мільёнаў долараў, прыкрыўшыся патрэбамі нацыянальнай бяспекі.

Цяпер жа застрашаная рада дырэктараў Кенэдзі-цэнтра сама рыхтуе рэзалюцыю аб вяртанні імя Трампа на фасад, апраўдваючы гэта тым, што толькі так можна захаваць аб'ект ад банкруцтва і дэмантажу.

#ЗША #Вашынгтон #замежжа