У гістарычным цэнтры Віцебска плануюць аднавіць Заручаўскую браму Ніжняга замка, аддаўшы пляцоўку пад камерцыйны інвестпраект з магчымымі падземнымі прыбудовамі.

Згодна з новым генеральным планам горада да 2035 года і праектам дэталёвага планавання, участак набярэжнай на плошчы 1000-годдзя каля Дабравешчанскай царквы ўжо змяніў прызначэнне. Замест зялёнай рэкрэацыйнай зоны тэрыторыя атрымала статус «грамадскай спецыялізаванай забудовы». Улады зарэзервавалі гэтую плошчу для ўзвядзення ўязной вежы і фрагментаў муроў Ніжняга замка на гістарычных падмурках.

Галоўны спецыяліст упраўлення культуры аблвыканкама Дзяніс Юрчак заяўляе, што для дакладнай лакалізацыі аб'екта дастаткова архіўных чарцяжоў, а сама пабудова павінна ўзводзіцца па сярэднявечных тэхналогіях з валуноў і цэглы. Аднак паралельна чыноўнік прапануе не музеефікаваць вежу, а перадаць яе прыватнаму інвестару для стварэння кафэ або рэстарана. Каб камерцыялізаваць аб'ект і павялічыць плошчы, праектам дапускаецца маштабнае паглыбленне ў грунт для стварэння дадатковых памяшканняў непасрэдна ў археалагічнай зоне.

У якасці прыкладу папярэдняй працы з фартыфікацыйнай спадчынай у інтэрв'ю згадваецца віцебскі Духаўскі круглік. Гэты аб'ект, пабудаваны з сучасных матэрыялаў, фактычна з'яўляецца павільёнам над аўтэнтычнымі падмуркамі. Як бы новая вежа не стала такім жа псеўдагістарычным навабудам з гістарычнай назвай.

Крыніца

#Віцебск #Ніжнізамак #замкі #аднаўленне