Кургану Славы пад Мінскам афіцыйна прысвоілі 1-ю (міжнародную) катэгорыю гісторыка-культурнай каштоўнасці.

Рашэнне аб павышэнні статусу манумента прыняла Беларуская рэспубліканская навукова-метадычная рада пры Міністэрстве культуры.

Прадстаўнікі ведамства пафасна заяўляюць, што новы статус юрыдычна замацоўвае значэнне мемарыяла як «помніка сусветнага маштабу». Трэба нагадаць, што дзесягоддзі да таго меў усяго толькі 3-ю катэгорыю, якая ахоплівае помнікі выключна рэгіянальнага (мясцовага) значэння. Цудоўнае празрэнне і «суверэннае права»!

Сам мемарыял, адкрыты 5 ліпеня 1969 года, з'яўляецца выбітным інжынерным аб'ектам і ўзорам савецкай манументалістыкі. Агульная вышыня кампазіцыі складае 70,6 метра. Зямны пагорак вышынёй 35 метраў і аб'ёмам звыш 91 тысячы кубічных метраў абапіраецца на 30-метровы слупавы падмурак. На вяршыню вядуць дзве лесвіцы па 241 прыступцы. Вянчаюць канструкцыю чатыры 35-метровыя штыкі-абеліскі, аб'яднаныя барэльефным кальцом, якія сімвалізуюць франты, што ўдзельнічалі ў аперацыі «Баграціён» і ліквідацыі «Мінскага катла» летам 1944 года.

Крыніца

#КурганСлавы #помнікі #ахова #савецкаяспадчына