Raqamli San’at

"Raqamli san'at" ijodiy birlashmamizning ishlar boshqaruvchisi Farhod Badalov "O'zbekiston" telekanali, "Oila vaqti" ko'rsatuvida o'z fikrlari bilan bo'lishdi.

Ko'rsatuv davomida Aibek va Aisha ijrosidagi "O'zbegim" musiqiy klipi ustida muhokama bo'lib o'tdi va "Samarqand" musiqiy klipi televideniyada premyera qilindi.

“SAMARQANDGA” – Aibek & Aisha

Biz Mirzo Ulug‘bekni olim, hukmdor va buyuk astronom sifatida bilamiz. Bu safar uning ulug‘vor siymosi ortidagi ota qalbini ko‘rsatishga harakat qildik.

Shoir Muhammad Yusufning “Samarqand” she’ri xiyonatga uchragan ota og’rig’ini juda sodda, lekin kuchli tuyg’u bilan ochib bergan. She’rda Ulug‘bek buyuk shaxs sifatida emas, dardini kimga aytishni bilmay qolgan ota sifatida namoyon bo‘ladi.

Biz aynan shu hissiy holatni sun’iy intellekt va raqamli texnologiyalar yordamida vizual hikoyaga aylantirdik.

Ushbu klip orqali adabiyot va tarixni bugungi tomoshabin uchun yangi vizual uslubda qayta his qildirishni maqsad qilganmiz.

Ijodiy birlashmamizning AI ijodkorlari Aibek va Aisha ijrosidagi ikkinchi musiqiy klipini Youtube kanalimizda tomosha qiling.

🎞: https://youtu.be/rEmhK9YKOIs

“Raqamli san’at” ijodiy birlashmasi Unitree va Pudu Robotics kompaniyalarining rasmiy distribyutori – VANT kompaniyasi bilan uchrashuv o‘tkazdi.

Uchrashuv davomida zamonaviy robototexnika texnologiyalari hamda ularni teatr, muzey, ko‘rgazma va turli madaniy tadbirlarda qo‘llash imkoniyatlari muhokama qilindi.

Asosiy e’tibor robotlarni shunchaki texnologik namoyish sifatida qo‘llashga emas, balki ular orqali tomoshabin tajribasini boyitish, interaktiv muhit yaratish, yoshlarning san’at va zamonaviy texnologiyalarga qiziqishini oshirish hamda ijodkorlar uchun yangi formatlarni shakllantirishga qaratildi.

Shuningdek, kelgusida ushbu texnologik yechimlarni madaniyat muassasalari va ijodiy loyihalarda amaliy sinovdan o‘tkazish imkoniyatlari ko‘rib chiqildi.

“Raqamli san’at” ijodiy birlashmasi san’at, madaniyat va zamonaviy texnologiyalar kesishmasida yangi imkoniyatlarni izlash va ularni amaliy loyihalarga aylantirishni davom ettiradi.

“Raqamli san’at” ijodiy birlashmasi va Aniq va ijtimoiy fanlar universiteti (AIFU) o‘rtasida hamkorlik memorandumi imzolandi.

Uchrashuvda sun’iy intellekt va raqamli texnologiyalarni ta’lim va ijodiy sohalarga tatbiq etish, yoshlar uchun zamonaviy bilim va amaliy imkoniyatlar yaratish masalalari muhokama qilindi.

Hamkorlik doirasida:

– Respublika yoshlariga mo‘ljallangan sun’iy intellekt va raqamli san’at bo‘yicha ta’lim kursini tashkil etish;
– AI yordamida vizual va interaktiv darsliklar hamda yangi avlod ta’lim kontentini yaratish;
– Raqamli san’at va kreativ texnologiyalar bo‘yicha amaliy loyihalarni amalga oshirish;
– yoshlarning zamonaviy texnologiyalar bilan ishlash ko‘nikmalarini rivojlantirish va yangi iste’dodlarni qo‘llab-quvvatlash rejalashtirilmoqda.

Hamkorlikning muhim yo‘nalishlaridan biri ta’limni yangi texnologiyalar bilan boyitish. AI yordamida nafaqat yangi bilimlarni o‘rgatish, balki ularni vizual va interaktiv formatlarda yetkazish imkoniyatlari ham amaliyotga joriy etiladi.

Tez orada universitet bilan hamkorlikda AI sohasida ta’lim berish bo'yicha o'quv kurslari va boshqa qo‘shma tashabbuslar amalga oshiriladi.

🎭 Abror Hidoyatov teatrida raqamli texnologiyalar joriy etiladi

“Raqamli san’at” ijodiy birlashmasi hamda Abror Hidoyatov nomidagi teatr rahbariyati o‘rtasida uchrashuv bo‘lib o‘tdi.

Uchrashuv davomida teatr sahnasini zamonaviy texnologiyalar asosida yangi bosqichga olib chiqish, xususan, 3D mapping, LED-texnologiyalar, raqamli dekoratsiyalar va vizual effektlarni joriy etish masalalari muhokama qilindi.

Asosiy maqsad sahna asarlarida tomoshabinga yanada kuchli taassurot beruvchi ultrarealistik muhit va uch o‘lchamli vizual effektlarni yaratish, an’anaviy teatr san’atini zamonaviy raqamli texnologiyalar bilan uyg‘unlashtirish.

Muzokaralar yakunida tomonlar mazkur yo‘nalishda hamkorlikni boshlash va ishlarni amaliy bosqichga olib chiqish bo‘yicha kelishuvga erishdilar.

Yangi hamkorlik doirasida raqamli texnologiyalarni teatr sahnasiga tatbiq etish bo‘yicha amaliy ishlar boshlanadi.

“O‘ZBEGIM” – Aibek

Erkin Vohidov “O‘zbegim” qasidasida xalqimizning qadimiy tarixi, milliy g‘ururi va o‘zligini betakror badiiy mahorat bilan ifodalagan.

Bugun ana shu ruh Raqamli san’at ijodiy birlashmamizning AI ijodkori Aibek tomonidan zamonaviy vizual tilda qayta jonlantirildi.

Musiqiy klipda o‘zbek xalqining asrlar davomida bosib o‘tgan yo‘li, tarixiy burilishlari, sinovlari va milliy ruhi sun’iy intellekt hamda zamonaviy vizual texnologiyalar yordamida yangicha talqin qilindi.

Loyihamizdan ko'zlangan maqsad tarixni shunchaki eslatib qo'yish emas, uni haqiqatan his qildirish.

Chunki “O‘zbegim” faqat bir davr haqida yozilgan qasida emas. Unda xalqimizning tarixiy xotirasi, o‘zligini anglash va millatga mansublik hissi mujassam.

Umid qilamizki, bu ruh zamonaviy ekranlar orqali yana bir bor xalqimiz qalbiga yetib boradi.

🎞: https://youtu.be/f_fJpTnWIMQ?si=8CJxxvPN16OavJik