КИМЛАНИШ

Сен кимсан – гуноҳин парвариш этган,
муҳаббат ўрнига, савоб ўрнига?
Сен кимсан – севгиси дунёдан ўтган
валекин келмаган кутган хўрлиги?

Сен кимсан – на дўст, на душман орттирмай
фақат изтироблар билан овунган?
Сен кимсан – умрининг тонгин оттирмай
худога қадрлар тилаб товунган?

Сен кимсан – ўн саккиз мингта оламдан
ҳеч бирининг кўзи учмаган кутиб?
Сен кимсан – куярга ғами таланган,
ўлмаган – умиди дунёдан ўтиб?

Сен кимсан – кўнглини тошларга уриб
чинни қисматини чил-чил синдирган?
Сен кимсан – йиғлаган кулиблар туриб,
сен кимсан – кўзёшдан шеърлар ундирган?

Сен кимсан – қараши терсу тескари,
на дўст, на душманга ўр ёғин берган?
Сен кимсан – бир осийлигин эскартиб,
хижолатдан кириб кетмаган ерга?

Сен кимсан – ўзини дунё устига
кул мисол аёвсиз сочган, совурган?
Сен кимсан – унут бир суйги тусдаги
юрагини армон билан қовурган?

Сен кимсан – на гулга шафқатни билган,
туйғулар қонини муттасил тўккан?
Сен кимсан – кимлигин билмаган билга,
қай гулнинг ёдига кўзёшдай чўккан?

Сен кимсан – топмаган тақдир ахтари(б),
Сомон йўл чанглари оралиғидан
камайиб борган сай бахтнинг хатари
кўнгилнинг тун каби қоралигидан?

Сен кимсан – саволдан ўзга дарди йўқ,
саволи – «кимарса», жавоби – «нима»?
Сен кимсан – кўз ёши билан қорни тўқ,
жавобсиз суйгиси шунча ваҳима?

Сен кимсан – дунёга саволлар бериб,
ўрнига муҳаббат излаган телба,
Тугаб бораётган кўнгил теримин
бошдан бошламоқни истаган келбат?

Сен кимсан – тани инс, хаёллари – жин,
муаллақликларда қотган тўрғайдай?
Сен кимсан – умидин эшшакдай миниб,
гўштини ҳаромга чиқарган дайди?

Сен кимсан – қаю бир қаторларда бор,
Не норсан, не зорсан, не хорсан, не дор?
Сен кимсан – на шоир ва на Фахриёр,
Не савол, не завол, не дард, не барор?

Сен кимсан?..

© Фахриёр