Инглизчада шунчаки «I still remember you» дейишади. Ўзбек тилида эса:

Бир осмон энгашди, бир сапчиди ер,
Бир оҳу ингради, бир ўкирди шер,
Юраклар тўхтади, босди совуқ тер,
Мен кетдим, сен қолдинг — хотима шундай,
Ҳар куни тушасан ёдима шундай.

Вулқонлар отилди, оқди оловлар,
Ўтдай кўкрагимга ёғди қировлар,
Англаб-англолмади баъзи бировлар,
Мен кетдим, сен қолдинг — хотима шундай,
Ҳар куни тушасан ёдима шундай.

Баҳорлар куз бўлди, кузлар юз бўлди,
Лаҳзалар йил бўлди, йиллар туз бўлди,
Бу «хайр» дегани сағир сўз бўлди,
Мен кетдим, сен қолдинг — хотима шундай,
Ҳар куни тушасан ёдима шундай.

Унда уфқ ёнарди: кўксим каби ол,
Сенинг ёшларингни ичарди рўмол,
Кўксимга туйдиму бир дунё малол,
Мен кетдим, сен қолдинг — хотима шундай,
Ҳар куни тушасан ёдима шундай.

Оёқда тик туриб ўлмоғим учун,
Ҳижрон подшоси ким — кўрмоғим учун,
Воҳ, сени кучлироқ севмоғим учун
Мен кетдим, сен қолдинг — хотима шундай,
Ҳар куни тушасан ёдима шундай.

Шерали Эшбўриев