«Որքան էլ ցինիկ կամ ցավալի լինի Արցախի հարցում եվրոպացի դիվանագետների վարքագիծը, այն Եվրոպայի որդեգրած քաղաքականության տրամաբանական շարունակությունն է»։

Sputnik Արմենիայի հետ զրույցում քաղաքական վերլուծաբան Հակոբ Բադալյանը մեկնաբանել է Ալիևի օգնականի կազմակերպած դեսպանների այցը Արցախի հայկական պատմամշակութային սրբավայրեր, որոնք Հաջիևը ներկայացրեց որպես աղվանական ու հեգնական-ծաղրական խոսույթով անդրադարձավ հայոց պատմությանը։ Սոցցանցերի հայ օգտատերերին ու հայաստանյան քաղաքական գործիչներին՝ մասնավորապես ընդդիմությանը, վրդովվեցրել էր հատկապես դեսպանների արձագանքը։

«Եթե դիտարկում ենք, թե ընդհանրապես Արցախի շուրջ ստեղծված իրավիճակի հարցում ինչպիսի դեր ունի Եվրոպան, ապա այդ դերը կարելի է գնահատել` որպես մեկնակետ ընդունելով 2022 թվականի հոկտեմբերի 6-ի Պրահայի հանդիպումը։ Հենց եվրոպական հովանու ներքո տեղի ունեցած գործընթացների արդյունքում է ձևավորվել այն քաղաքական միջավայրը, որի շրջանակում Հայաստանի իշխանությունները ճանաչեցին Արցախը Ադրբեջանի կազմում։ Եվրոպացիներն են իրավիճակը հասցրել այդ կետին՝ իհարկե ելնելով իրենց քաղաքական հաշվարկներից, և ոչ թե պարզապես Ադրբեջանին լավություն ու Հայաստանին վատություն անելու տրամաբանությունից։ Հետևաբար հիմա էլ նրանք շարունակում են գործել իրենց քաղաքական հաշվարկների շրջանակում»,–մեկնաբանում է Հակոբ Բադալյանը։

Վերլուծաբանը Եվրոպայի ներկայիս քաղաքականությունը դիտարկում է տարածաշրջանային հաղորդակցությունների և, մասնավորապես, «Միջին միջանցքի» համատեքստում․ եվրոպական կողմը Հայաստանին տարբեր տրամաբանությամբ կարկանդակներ է խոստանում՝ միայն թե պաշտոնական Երևանը հնարավորինս արագ ընդունի այն բոլոր պայմանները, որոնք ներկայացնում է Ադրբեջանը։

♥️@RadioSputnikArm | 🔴🔴 106.0FM