#asar_tavsiya
Ўткир Ҳошимов ҳақида гап кетганда, мен уни нафақат машҳур ёзувчи, балки ўзбек халқининг руҳиятини ғоят нозик ҳис қилган адиб деб биламан. Бу фикримга энг катта далил унинг «Икки эшик ораси» асаридир. Агар бу китоб бир китобхоннинг ҳаётида қандай яшаши мумкинлигига мисол келтириш керак бўлса, ўзимни бемалол мисол қилиб кўрсата оламан.
Мен бу асарни ҳаётимнинг турли босқичларида – болаликда, ўсмирликда, навқирон йигитлик давримда ва ҳатто бошимга оғир синовлар тушиб, тўрт девор ичида қолган кунларимда ҳам қайта-қайта ўқиганман. Ҳар гал мутолаа қилганимда ундан аввал сезмаган бир маънони, аввал англамаган бир ҳақиқатни кашф этгандек бўламан. Энг ажабланарлиси эса, шу пайтгача бошқа ҳеч бир асарни бу қадар кўп марта ўқимаганман. Насиб этса, бу асар бўйича тўлиқроқ тақриз ҳам ёзишни ният қилиб, ҳатто қораламасини ҳам бошлаб қўйганман. Сиз азизларнинг дуоларингиз билан яқин орада каналимизда эълон қилишдан умидвормиз.

✍🏽@qoraa_qalam