ТАБРИКНОМА

Ҳамватанони азиз!

Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Россия оид ба муҳоҷират шуморо ба муносибати Рӯзи бузургдошти Абуабдуллоҳи Рӯдакӣ — сардафтари адабиёти классики форсу тоҷик, одамушшуаро, султони шоирон самимона табрик ва муборакбод менамояд.

Таҷлили Рӯзи Рӯдакӣ дар Ҷумҳурии Тоҷикистон ифодаи эҳтироми хос ба ашъор, ҳикмат ва мероси адабии бузурги миллати тоҷик мебошад.

Абуабдуллоҳи Рӯдакӣ на танҳо асосгузори адабиёти классикӣ, балки рамзи ҳувияти миллӣ, сарчашмаи маърифат, инсондӯстӣ, ватандӯстӣ ва бузургии сухани тоҷикӣ аст. Осори ӯ дар тӯли ҳазорсолаҳо дилҳоро равшанӣ мебахшад, забон ва фарҳанги моро эҳё мекунад ва наслҳоро ба эҳтироми таърих, адаб ва анъанаҳои неки миллӣ пайванд месозад.

Боиси ифтихор аст, ки ҳамватанони мо дар хориҷи кишвар, аз ҷумла дар Федератсияи Россия, бо нигоҳ доштани забон, фарҳанг ва анъанаҳои миллӣ пайванди худро бо Ватани азиз устувор нигоҳ медоранд.

Рӯзи Рӯдакӣ барои ҳамаи мо фурсати муносиб аст, ки бори дигар ба бузургии сухани тоҷикӣ, мероси гаронбаҳои ниёгон ва ваҳдати фарҳангии халқи тоҷик сар фурӯд орем.

Дар ин рӯзи фархунда ба ҳар яки шумо саломатии комил, хушбахтии оилавӣ, рӯзгори обод, комёбиҳои нав дар кору фаъолият ва дидори пайвастаи Ватан орзу менамоем. Бигзор номи Рӯдакӣ ҳамеша дар дилҳои мо зинда бошад, забони модарӣ дар хонаи ҳар як ҳамватан садо диҳад ва фарзандони мо бо ифтихор аз мероси бузурги ниёгон ба камол расанд.

Рӯзи Рӯдакӣ муборак бошад!

Бо эҳтироми самимӣ,
Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Россия оид ба муҳоҷират