​Inogʻoch – obkash

Obunachilardan biri ruscha коромысло soʻzi oʻzbekchada nima deyilishi haqida soʻrab qoldi. Qizigʻi, bu savolni dastlab bir bolakay beribdi. Ertak kitobdagi коромысло rasmini koʻrsatib “Bu oʻzbekchada nima boʻladi?” deb soʻrabdi.

Ruscha коромысло soʻzi ikki uchidagi ilmogʻiga chelak osib, yelkada suv va boshqa narsalar tashish uchun moslangan yogʻoch asbobni anglatadi. Izohli lugʻatga koʻra, bu soʻz oʻzbekchada obkash deyiladi. Obkash forschadan, suv tortuvchi, tashuvchi maʼnosida. Lugʻatlardan obkashni ifodalovchi oʻzbekcha soʻz topilmadi. Lekin Xorazm shevasida bor ekan – inogʻoch. Shevalar oʻz bagʻrida durdonalarni saqlaydi, ulardan unumli foydalanish kerak.

Inogʻoch – sof turkiycha soʻz. Iyin va ogʻoch soʻzlaridan yasalgan. Iyin shevada yelkani anglatadi. U egin soʻzining oʻzgargan shakli. Ogʻoch esa daraxt; yogʻoch, xoda maʼnosiga ega. Demak, inogʻoch коромыслоning maʼnosini ortigʻi bilan bera oladi. Bu soʻzdan badiiy adabiyotlar va tarjimalarda albatta foydalanish kerak.

Bu soʻz qozoq tilida inagʻash shaklida ishlatilar ekan.

@oriftolib | Sahifalarimiz