#Ўқитувчи_мураббийлар_куни
УСТОЗ — ИЛМ ВА МАЪРИФАТНИНГ БОҚИЙ ЧИРОҒИДИР!
Ҳурматли профессор-ўқитувчилар, устоз ва мураббийлар!
Қадрли ҳамкасблар!
Сиз, азиз устозларни 1 октябрь — Ўқитувчи ва мураббийлар куни билан Имом Бухорий номидаги Тошкент ислом институти жамоаси номидан самимий муборакбод этаман!
Устозлик — шунчаки касб эмас, балки инсон қалбига илм, маърифат, одоб ва эзгулик уруғини сочишдек улуғ масъулиятдир. Айниқса, диний таълим соҳасида устознинг вазифаси янада юксак маъно касб этади. Зеро, у нафақат билим беради, балки шогирдининг эътиқоди, дунёқараши, маънавияти ва ҳаёт йўлини шакллантиришда ҳам муҳим ўрин тутади.
Қуръони каримда шундай марҳамат қилинади: «Аллоҳ сизлардан иймон келтирганларни ва илм берилганларни даражалар билан кўтарур» (Мужодала сураси, 11-оят). Бу оят илм аҳлининг мақоми қанчалар юксак эканини яққол кўрсатади.
Яна бир ояти каримада: «Билганлар билан билмаганлар тенг бўладими?»
(Зумар сураси, 9-оят) дея илмнинг инсон ва жамият ҳаётидаги беқиёс ўрнига эътибор қаратилади.
Расулуллоҳ соллаллоҳу алайҳи васаллам эса: «Аллоҳ кимга яхшиликни ирода қилса, уни динда чуқур тушунча соҳиби қилади», деб марҳамат қилганлар (Имом Бухорий, Имом Муслим ривояти).
Шу маънода, устознинг ҳар бир дарси, ҳар бир насиҳати, ҳар бир шогирдига берган билими — келажакка қолдириладиган маънавий меросдир.
Бугунги кунда юртимизда устоз ва мураббийларнинг меҳнатига юксак эҳтиром кўрсатилаётгани ҳам ана шу ҳақиқатнинг амалий ифодасидир.
Ўқитувчилик мақоми ва нуфузини жамиятда янада юксалтиришни давлат сиёсатининг энг муҳим ва устувор йўналишларидан бирига айлантирган Президентимиз Шавкат Мирзиёев:
«Биз устозни отадек улуғ деб билган, уни ҳамиша бошига кўтариб эъзозлаган буюк, маърифатпарвар халқнинг вакилларимиз».
Давлатимиз раҳбари яна бир муҳим фикрни билдириб: «Сиз, азиз устозлар, ҳаётини дунёдаги энг улуғ ва шарафли ишга — ёш авлодни билимли, маънавий етук ва ватанпарвар қилиб тарбиялашга бағишлаган муқаддас соҳа эгаларига чин қалбимдан миннатдорчилик билдираман. Янги Ўзбекистон келажагини бунёд этишдаги хизматларингиз бениҳоя каттадир», деб таъкидлаган.
Дарҳақиқат, илмни авлоддан авлодга етказадиган, яхши тарбияни қалбларга сингдирадиган буюк куч — бу устоз ва мураббийдир.
Азиз устозлар!
Имом Бухорий номидаги Тошкент ислом институтида сизлар зиммангиздаги масъулият янада улуғ.
Зеро, бу даргоҳда келажак имом-хатиблар, уламолар, тадқиқотчилар ва маърифат фидойилари таълим оладилар.
Шунинг учун ҳар бир маъруза, ҳар бир дарс, ҳар бир суҳбат ва ҳар бир шахсий намуна шогирдлар тақдирида ўзининг муносиб изини қолдиради.
Буюк аждодларимиз —
Имом Бухорий, Имом Термизий, Имом Мотуридий, Бурҳониддин Марғиноний, Абул Муъин Насафий, Баҳоуддин Нақшбанд
ва бошқа алломаларнинг илмий мероси бизга бир ҳақиқатни ўргатади:
илмга садоқат, устозга ҳурмат ва шогирдга масъулият — маърифат тараққиётининг энг мустаҳкам пойдеворидир.
Бугун биз ана шу буюк анъананинг муносиб давомчилари бўлишимиз, замонавий билим ва педагогик технологияларни миллий ва диний илмий меросимиз билан уйғунлаштириб, баркамол авлодни тарбиялашимиз зарур.
Муҳтарам устозлар!
Сизларнинг машаққатли, аммо шарафли меҳнатингизга юксак ҳурмат билан қараймиз.
Сизларга мустаҳкам соғлик, оилавий хотиржамлик, қалб хотиржамлиги, илмий ва ижодий барака тилайман.
Аллоҳ таоло сизларнинг илм йўлидаги ҳар бир ҳаракатингизни савобли амаллардан қилсин, берган илмингизни зиёда этсин, шогирдларингизнинг камолини кўриш бахтини насиб айласин.
Устозларингиздан олган илмингиз — мерос,
шогирдларингизга берган илмингиз — садақаи жория,
қолдирган маънавий изингиз эса — умрбоқий меросдир.
Барчангизни яна бир бор 1 октябрь — Ўқитувчи ва мураббийлар куни билан чин қалбимдан муборакбод этаман!
Илмингиз зиё, қалбингиз нур,
меҳнатингиз баракали,
шогирдларингиз камоли доимо кўзингизни қувонтирсин!
Ҳурмат ва эҳтиром билан,
Уйғун Ғафуров
Имом Бухорий номидаги
Тошкент ислом институти ректори
📱 @oliymahad – диний-маърифий канал!
📱Youtube📱Facebook📱Instagram