31. Николай Никифоров. Толэзен вераськон: веросъёс, повестьёс: [быдэ вуымтэос понна] / Суредаз Расиф Батыршин. Ижевск: Удмуртия, 1995. 199 с.

Нимысьтыз 13–17 аресъем пиналъёслы гожтэм романтической яратон темаен удмурт чеберлыко книгаосты мон уг тодӥськы. Тодам ваисько Фатих Пукроковлэсь «Кизили ныл» повестьсэ гинэ. Николай Никифоровлэн книгаез – адямиослэн ог-огзэс ватытэк, шара яратэмзы сярысь, та выллем яратон туж дуно, туж бадӟым ценность, кинлэн сыӵе яратонэз вань - солы вожъяськыса вӧсь карыны туртто.

Книгаысь «Пунэмзэ берыктон» но «Куартолэзе кисьмам узы» повестьёсыз экранизировать карыны ярасал: отын событиосын сюжетэз вошъяське но ваньмыз син азе яркыт пуксе. Гуртысь адямилы матын но валамон пусъем ужпумъёс но ситуациос, автор быгатыса суреда инкуазез, юртъёсты, корка пушез. Автор лэчыт луись ужпумъёсты синйылтэ но возьматэ гуртысь адямилэн синмыныз ик. Шуом, кыӵеен учко егит пиосмурт шоры – одӥг сямен, нош нылмурт шоры ке – мукетгес ини.

Ульфат Бадретдиновлэн «Туннэ – ӵуказелэн кутсконэз» романаз сямен ик пиосмурт быгатэ ас мылкыдызъя аслэсьтыз но, яратоно нылмуртэзлэсь улонзэ воштыны, эрикез солэн тросгес ик. Николай Никифоров нош героиняезлэсь адӟонзэ быгатэ возьматыны мукет геройёсызлэн вакчи фразаоссы пыр гинэ: нылмуртэз ведь ваньзы жаляло. Жаляло ке, жаляло, но вот озьы гожтэмын ини: улон тонэ нуэ, тон соя кариськиськод. Автор трос уг бугыръяськы геройёслэн пушказ, но соос ваньзы туж оскымон суредамын: сямъёссы улонысь, удмурт гуртлэн улонысьтыз басьтэмын.