36. Михаил Петров. Старый Мултан. Роман. Москва: Советский писатель, 1956. 420 с.

 Бератаз лыдӟыса быдэстӥ ик романэз ӟучен но. Предложениос вакчиесь, но котькудӥз мертамын – адӟиське мастерлэн трос, тыршыса ужам ужез.

Ӟучсэ переводэз но лыдӟыкум, бӧрдытэк ӧй чида. Судын оправдать карем удмуртъёс, ньыль ар ӵоже гуртсылэсь кужмысь люкем муртъёс, доразы, Вуж Мултанэ, берто. Бусы капка дорын пумисько солдатэ келясьёсын: одӥгезлэсь мозмытэм муртлэсь, Никифорлэсь, пизэ черодтэк армие басьто вылэм... Пумисько атаен пиез нош ик оло весяклы люкиськон понна – макем ӝож сцена!

Нялтас вераса, роман кинематографичной. Эпизодъёс – со син азе пуксись сценаос. Малыез валамон но: романэз гожъян вакытэ автор сое сценалы дасяз, драма гожтӥз но трос пол удмурт театрын пуктӥз.

Романлэн ӟуч кылэ берыктэмез но удмурт оригиналэз пуштросъя туж ик уг висъясько ке но, ӟуч берыктэм удмуртэзлэсь 20 бамлы кузьгес. Малпай, Михаил Петров переводзэ дасяса, романзэ идеология ласянь тупатӥз. Кылсярысь, кыти-оти со азьвылзэ, удмуртэн гожтэмзэ, шонератэ. Яке, шуом, одӥгез валтӥсь персонаж – Герей – переводной версиын берпумети суд дыръя удмуртаз кадь ик кылъёссэ вера, нош мыным потӥз, ӟуч кылын вераськемез меӵкытгес, золгес, кужмогес пӧрмиз. Озьыен, автор кужмо эмоциональной синонимъёсты но интонациосты шедьтыны быгатэм.

Эшшо, мар тунсыкоез: нылкышно персонажъёслы автор ӟуч версияз тросгес саклык висъям – идеология ласянь соосты тупатон понна. Кылсярысь, Вера Сергеевна дышетӥсь ӟучаз переводын келямын луэ пермь палъёсы ссылкае, отысь егит нылкышно пегӟе, пегаса ветлонъяз, пумиське Фросяен, романысь мукетыз персонажен. Удмурт версиын соос ноку валче уг вуо: укыр пӧртэмесь сямзыя. Нош переводной произведениын Фрося но Вера Сергеевна одӥг кадь адӟонтэм каро узыръёсты.  Удмурт романын Фрося ӧвӧл – со Фроська – «сӧриськем ныл». Озьы, пе, шуо нылмуртэз гуртын, гожтэ повествователь, но, калыкын вӧлдӥськем кылъя кариськыса, мыскыл карысагес, серемпыргес ик суреда та персонажез.

Нош ӟуч переводын мадёсчи чылкак мукет интонациен со сярысь маде. Фрося табере ини йӧно нылмурт луэ. Но таӵе выль образ Михаил Петровлэн переводаз нокызьы уг лякиськы Фросялэн мукет функциеныз: ведь со отчы пыртэмын костаськись нылмуртэз возьматон понна. Но кызьы ке но автор ог-огезлы тупасьтэм сямъёсты Фросялы сётэ но куштэ сое: романлэн шораз, нылмуртэз Раевский но гыжкалъёсыз сантэмамзы бере, Фрося уг адӟиськы ни. Мар соин луиз тодмо ӧвӧл. Ма, кулэ но ӧвӧл: Фрося функция понна гинэ пыртэмын вал. Но удмурт оригиналысь Фроська мыным жальгес потэ, малы ке шуоно, нокин но сое уг жаля, мадёсчи гинэ но.