Геннадий Павловлэн книгаяз пыртэмын кык повесть:«Юбера пиос» но «“Эзель” кизилилэн быремез яке Ладилэн паймымон ужъёсыз». Фантастической повесть сярысь пусйысал гинэ, сюжетэз ӟеч шуыса, лыдӟисьлы тунсыко потоз, киносценарий выллем гожтэмын, чаляк вошъяськись суредъёс тодэ кылё: мон быгатӥсько та кузьмадёсысь эпизодъёсты син азям пуктыны. Сюжетлэн завязкаез усто, нош кульминациез но развязкаез соин ӵошатыса, золгес мед луысал кадь потэ, но ӧвӧл… Озьы ке но, со туж тунсыко, туж. Кызьы совето вакытлэн берло аръёсаз учкиллям совето адямиос мукет кунъёс шоры, кызьы син азязы пуктӥллям отысь улон-вылонэз. Геннадий Павлов тае ваньзэ возьматэ удмурт гуртысь адямилы, крестьянлы валамон луись понятиосын.
«Юбера пиос» повесть усьтэ асьмелы война вакытэз, 1941-тӥ – 1945-тӥ аръёсы удмурт гуртысь улонэз пичи пилэн учкемез пыр. Ож кутскон аре Пави нырысетӥ классэ мынэ. Куректыса, бӧрдыса семьяез атайзэ оже келя. Собере быдэс повесть пыр шӧдӥське пичи пиналлэн атайзэ витён мылкыдыз, дырын-дырын ӝожомемез, фронтысь гожтэт возьмаса улэмез. Со куректон пыр чильпыра шумпотон но серекъян – Пави ведь пичи пинал на. Павилэн аслыз пуны басьтэмез, сое будэтэмез-утемез сярысь но маде. Кучапиезлы Джек ним сётӥз вал но, нош гуртоос сое Ӝӧк нимазы.
Гуртлэн улонэз арлэн вакытъёсыз пыр возьматэмын: пырпотоно ӟар-кезьыт толэз. Тулыс вуон – сиёнлы ёрмон. Вань запасъёс быремын тол ӵоже, Павилэн анаез чурыт куртчем бускелезлэсь пызь курыны мынэ. Гужем – аран дыр но выль нянь пыжон нунал. Озьы ке но, нянь сиыны туж ёрмоно. Нош куке пичи пи ӧвӧлтэм няньзэ бускель пунылы сюдӥз – кыӵе ӝожомиз анаез. Сӥзьыл, нош толалтэ вуэ. Озьы мынэ гуртысь улон, арлэн вакытъёсыз пыр. Мар но ӧй вал соку гуртын: войнаысь берто сӧсырмем воргоронъёс, гуртын секыт висён вӧлмыса, пиналъёс куло, мукет кайгу – пудо быре. Бен мар но уг луыта гуртлэн улоназ.Трос вакчи историос-веросъёс маде повествователь. Куректон мылкыдэн валче шумпотонъёсыз вань – кунояськонъёс, сюлмысь вераськонъёс, гыронбыдтон праздникъёс но чебер инкуазь суредъёс.
«Шундыберганъёс сяськаяськыку учкы ай Юбера шоры иншыр гурезь йылысен: нап-вож бакчаостӥ юг-юг ӵуж лентаос кыскемын, кожалод. Озьы пишто тэркы быдӟаесь шундыберган йыръёс… Кӧня шундыос та вакытэ бакчаосын! Котькудӥз котырын тыршись, сюреласькем куко мушъёслэн, майсыослэн ужгурзы лумбытъёсын уг дугдыло».
Мар шуод! Быгато удмурт писательёс инкуазьмылэсь чеберзэ возьматыны. Геннадий Павловлэн пичи гинэ повестяз кӧня сыӵе чебересь суредъёс-сюжетъёс, кудъёсаз шока поэзия.