37. Николай Васильев. Бадӟым кызлэн вужерез. Повестьёс, веросъёс, выжыкылъёс. Ижевск: Удмуртия, 1980. 190 бам.

Книга гожтэмын нылпиос понна. Валтӥсь геройёс – 12-13 аресъем пиос. Бичет кылдытэмын вакчи произведениослэсь, соос гожтэмын капчи литературной кылын вакчиесь предложениосын. Персонажъёслэн репликаосазы Николай Васильев быгатыса пыртэ огшоры вераськон кылэз но. Кылсярысь, тунсыко лымшор диалектизм синйылтӥ: «Умме усиськем, лэся, эньгек», – вера пӧраськись Одоть кенак «Шур дурын палаткаос» повестьын. Энгек кыл ӝожомон, йыркуръяськон эмоциез возьматэ. «Какая досада!» шуыса мон берыктысал мон сое ӟуче. Яке мукетыз пример: «Петька! Тон просто визьпог» – черетске мукетыз персонаж та ик повестьын. Комической эффект кылдытэ ӟучо-удмурто веран, куке чылкыт удмурт литературной кылын гожтэм текстын со шоры мырӟиськиськод.

Мукетыз мае мон синйылтӥ – со инкуазь. Сборникысь ужъёс пичиесь, сюжетъёс воштӥсько, но котькудаз текстын пумиськоно нюлэсэн но шурен – та интыосын кыӵе ке учыр азинске. Пиналъёс понна нюлэс чик но кышкыт но кӧшкемано кадь ӧвӧл. Соос отчы шудыны ветло, нюлэс пиналъёсты ватэ соосты вӧсь карись бадӟым муртъёслэсь. «Шур кузя нюлэскытӥ» веросэз ке лыдӟоно – со книгалэн шораз ик пуктэмын – лыдӟыса, нюлэслэсь шокамзэ шӧдон тужгес но золоме. Мыным зэмзэ но потӥз, мон шокасько нюлэс зынэн – ӝокыт но нюр интыен, яке сазь-сазь но кезьытэн. Берло дыре Карина Шаинянлэсь «Саспыга» романзэ лыдӟыса, сыӵе эффектэз шӧдӥ вал.

Сюжетъёс ке сярысь, мон шуысал, та книгаын ваньзы соос кылдытэмын одӥг но кужмо эмоциез поттон вылысь – маин ке выленыз абдратӥсеныз пумиськон, ватӥськемзэ шараян. Валамон, малы со озьы кулэ: лыдӟись нылпилэсь саклыксэ возён понна. Николай Васильевлэн пӧрмиз, шуыны луоз, ачим ке сярысь.

Эшшо мар монэ паймытӥз: одӥгаз повестьын, нылпиослы повестьын (!) валтӥсь герой быре. Гожтэмын, кызьы со быре, озьыен, лыдӟись син азяз пуктоз писателен гожтэм эпизодэз. Монэ та ваньмыз куалектытӥз. Нош пинал лыдӟись мар шуоз? Пусъемын ини, удмурт литературалэн со сыӵе аспӧртэмлыкез шуыса – натурализм.