6. Ульфат Бадретдинов. Туннэ – ӵуказелэн кутсконэз. Роман. Ижкар, 2022.

Ульфат Бадретдиновлэсь романзэ туж тупасал лыдӟыны пиналъёслы но егитъёслы яке солы, кинлэн лыдӟемез уг поты ӝожомытӥсь литератураез: романын автор мур суредамтэ куректӥсь адямиосты, соослэсь секытэсь шӧдонъёссэс. Ӝутэм ужпумъёс нош – шудон уж ӧвӧл: романын оглом удмурт интеллигенцилэн историез возьматэмын. Автор тодматэ 1910-тӥ аръёсысь удмурт азьветлӥсьлэн Максим Прокопьевлэн улон сюресэныз. Максим Прокопьев ожын быре, нош аслаз гурт калыкез сое адӟонтэм каре.

Малы озьы луиз? Тани мар гожтэмын романын. Максим Прокопьев граждан войнаын ожмаськон дыръяз, вордскем гуртаз Нырьяын но туала Кукмор ёросэ пырись гуртъёсысь солэн нимыныз горд армилы продразверстка люкаса, крестьянэз няньтэк кельтӥллям. Максим войнаысь ӧз берытскы ни. Семьезлы – кышноезлы но пиналъёсызлы Нырьялась кошконо луиз: гурт калык йыркуръяськиз Максим Прокопьевлы, юзэс таламзы понна сое янгыш кариз.

Укмыстонэтӥ аръёслэн кутсконаз ини Прокопьевлы Нырьялан синпелет пуктон борды басьтӥське отысь школаез йылпумъям но удмурт кылосбур факультетэз быдэстэм егит пи Серафим Николаев. Шӧдтэк шорысь солы лушкем пумитъяськисьёс сюро – Нырья школалэн директорез но бигер гуртысь эшъёсыз Серафимез кышкато, йыркуръясько песятайёссы понна. Озьы тӥни Максим Прокопьевлы ваньмыз понна огназлы кылкутоно луиз шӧдтэк шорысь.

Серафим Николаев но Нырьялась кошкиз. Со вуэ Ижевске. Ижын солэн ужамезлы лушкемен пыд пуктӥсьёс сюро – огъя вераса, романын возьматэмын удмурт интеллигенциысь одӥгез муртлэн улон сюресэз но солэн адӟонэз. Мар веранэз! – лыдӟоно сое.

Нош Нырья гуртын Максим Прокопьевлэсь нимзэ сӥлы каро, данъяло ик – но только соку, куке сое тодӥсь муртъёс улонысь кошко, нош выль поколениелы со нокыӵе но уг пот – омырысь вожпотон мылкыд тӧлӟемын ни!

Озьы ик автор туала Башкортостанысь удмуртъёслэсь улэм-вылэмзэс усто возьматэ. Гуртысь калык мур оске ведӥнъёслы. Ульфат Бадретдинов тае пыртэ мадёсэ: героиняос-ведӥнъёс сэрен, кышномурт висьыса кулэ; ведӥн, коӵышлы берытскыса, уин шайвылэ бызьылэ. Автор саклык висъя ведӥнлэн шӧдонъёсызлы, сюлмаськонъёсызлы, ачиз кадь ведӥнэн эшлыко кусып воземезлы. Романын возьматэмын, кызьы адями ведӥнлы пӧрме, яке кызьы сое кулэмез бере вато, со шайвылысь гуртэ бертонтэм понна.

Камсьӧр удмурт интеллигенцилэн тусбуез суредамын нылкышнолэн улонэз пыр: автор маде Светлана Хузина-Куноевалэсь историзэ, пичи дырысеныз кутскыса быдэ вуытозяз. Школаын ныллы чидано луэ вожъяськись эшъёсызлэсь мыскыл каремзэс. Соослэн исаськемзылы луыса, Света трос ас пушказ сюлмаськиз, кылбурамезлэсь возьдаськиз, ватӥз сое, мурт серекъямлэсь кышкаса.

Романысь яратон кусыпез пусъеме потэ: со туж патриархальной, кышномуртэн кузёяське пиосмурт. Быдэ вуыса но бызьыса, Света пиосмуртлэн властезлы пумит султӥз. Кылсярысь, картэзлэн Бирске гинэ ыстэмез потэ вал сое дышетскыны, нош нылмурт удмурт кылосбур факультетэ Ижевске лыктӥз. Светалэн туж потэ вал гань-гань дышетскемез университетын.

Но 1-тӥ курс бере ик сое лушказы, собере со нылпи ваиз, потӥз заочное, дышетскыкуз ик кыкетӥзэ, куинетӥзэ пинал вордӥз. Таяз учыре ини картэзлэн авторитетэзлы (картэз Фёдор Куноев – Светалэн школаысь дышетӥсез вал) пумитъяськыны ӧз быгаты. Тӥни озьы Светалы кияз нуныен дышетсконо луиз. Гурт калыклэн малпаназ ведь – нылмурт бызиз ке, солы одно ик чалякгес нылпи вордыны кулэ. Света но сыӵе огдышем сямлы луыса тэльмыриз. Умой, та темаез автор ӝутӥз шуыса.