Jamshid Kholikulov

Assalom alaykum!!!
UzGeeks'da Dizayn kuni!

📆 3-oktabr, shanba kuni Toshkent shahri Raqamli texnologiyalar vazirligi binosida "UzGeeks October2026 Design Day Meetup" bo'lib o'tadi.

1️⃣ Jamshid Xoliqulov - CEO @ Fido studio
2️⃣ Nurjahon Farmonov - Art director & Dizayner
3️⃣ Hudoyor Norchayev - Product Designer @ cdti
4️⃣ Saidmahmud Sharipov - Team Leader @ Digitagro

🕰 Meetup odatiy ravishda bepul bo'lib, soat 14:00 da boshlanadi, unda qatnashish uchun UzGeeks saytida ro'yxatdan o'tish kerak.
Manzil: Toshkent shahar, Mirzo Ulug'bek tumani, Muminov ko’chasi, 4A (Raqamli texnologiyalar vazirligi binosida)

Hamkorlar:
O'zbekiston Respublikasi Raqamli texnologiyalar vazirligi
Raqamli ta'limni rivojlantirish markazi
Thinkland

Guruh | Kanal | Facebook | 💫 Donate
https://uzgeeks.com/

Bugun TAF26 doirasida Creativity & Craft yo’nalishida mahalliy loyihlarni baholash qismida qatnashdim, bu yil loyilar judayam ko’p, loyihalar o’rtasidagi konkurensiya ham yuqori, bu yil juda kuchli loyihalarni guvohi bo’ldim. Shu bilan birga o’z yo’nalishiga mos bo’lmagan loyihalar ham ko’p. Muhimi expertlar holis baholashdi deb aniq ayta olaman. @uzbekmarketing va Diyor akaga katta rahmat!

Bilasizmi, men jamiyatimizda xoh davlat idorasi bo'lsin, xoh xususiy sektor — juda g'alati bir illatni ko'raman. Ko'p rahbarlar hamma narsani men bilaman deb, o'zlarini har qanday sohada mutaxassisdek his qilishadi. Qo'l ostidagilar esa ularga qarab "yo'q, buni bunday qilmang, bu noto'g'ri" deyishga qo'rqishadi.

Men rahbarmanmi, demak, mening qo'l ostimdagi odam o'z fikrini ayta olmasligi — bu mutlaqo normal bo'lmagan holat. Keling, oddiy misol keltiraman. Bitta mutaxassis yoki studiya zo'r dizayn qildi deylik, marketing bo'limi buni katta raisga olib kiradi. Rais o'zining shaxsiy didi bilan qarab, "xo'sh, menga bu yoqmadi, mana bu joyida gumbaz bo'lishini xohlayman" deydi-qo'yadi. Bo'ldi, shu bilan mutaxassisning mehnati ham, bilimi ham yo'qqa chiqadi.

Aslida qanday bo'lishi kerak? Rivojlanishimiz uchun rahbar mutaxassisga qarab: "Qara, bu narsa menga yoqmayapti, men buni tushunmayapman. Lekin sen o'zing mutaxassis sifatida nima deb o'ylaysan, bu sifatlimi?" deb so'ray olishi kerak. Agar xodim buning zo'r qilingan ish ekanini aytsa, rahbar shaxsiy didiga umuman to'g'ri kelmasa ham, buni qabul qila bilishi shart.

O'zimning jamoamda ham ba'zida shunday bo'ladi. Men bilan ishlaydigan bollarga "mana shunday qilaylik" desam, ular "yo'q, biz buyurtmachi bilan gaplashganmiz, o'zimizning mezonlar bor, siz aytgandek qilsak noto'g'ri bo'lib qoladi" deyishadi. Ochig'i, ba'zida bu menga yoqmaydi, lekin ich-ichimdan ko'nikaman va ularga "mayli, men axborot sifatida aytib qo'ydim, o'zinglar qaysi birini to'g'ri deb bilsanglar, shunday qilinglar" deb qo'yib beraman. Chunki har bir inson o'z yo'nalishiga javob beradimi, rahbar ularni eshitishi va ishni ularga ishonib topshirishi shart.

Har qanday tashkilotda xodimlar rahbardan qo'rqmasdan erkin fikr bildira olishi kerak. Hatto hokimyat-u vazirliklarda ham.

@lazizhamidov

Ancha bo’ldi yozmaganimga, oxirgi yangiliklardan maqolam chiqdi.

Eng muhim formula: "Siz xohlagan hamma narsa 'avval yomonroq' bosqichining narigi tomonida turadi". Ya'ni o'sish yo'li avval qiyinchilik orqali o'tadi, keyin cho'qqiga chiqadi.

3-amaliyot: "Ikkinchi ovozingizga ishoning" (Trust Your Second Voice)

Qo'rquvni ifodalovchi ichki murabbiy — boshingizdagi yagona ovoz emas. Ikkinchisini intuitsiya, oliy "men". U qo'rquv orqali emas, energiya orqali gapiradi — energiya ruhingizning tilidir.

Amaliy misol: 24 yil davomida talabalar unga eng ko'p "tanlay olmayapman" muammosi bilan kelishgan. A varianti — eski sohadagi aniq yo'lli ish, B varianti — qo'rqinchli, lekin qiziqarli g'oya. U shunchaki "Har bir variantda sizni nima hayajonlantiradi?" deb so'raganda, xonadagi energiya qanday o'zgarishi darhol seziladi — odam xonaga kirishdan oldin ham javobni bilgan bo'ladi.

Nutqning eng kuchli savoli: "Agar katta qaror oldida turgan bo'lsangiz, o'zingizdan so'rang: siz haqiqatan aniqlik yo'qmi, yoki shunchaki qo'rqyapsizmi? Ruhingiz allaqachon javob bergan. Qolgani — qo'rquv bilan savdolashish, xolos".

Qo'rquvni yengishning amaliy usuli: uni qog'ozga yozing. Qo'rquvlar ong ostida yashirinib turganda eng xavfli — o'shanda ular sizni falaj qiladi. Qog'ozga tushirsangiz, ular yechilishi kerak bo'lgan masalaga aylanadi.

Yakuniy xulosa — "Yaxshi kunlar hozir"

Weaver "The Office" serialidagi iqtibos bilan yakunlaydi: "Qaniydi, yaxshi kunlar ichida ekaningni ular o'tib ketmasdan oldin bilsang". Uning xulosasi: parvozning maqsadi — parvozning o'zi. Ya'ni ota-onalikning maqsadi bolani birinchi sinfdan ikkinchisiga o'tkazish emas, balki o'sha lahzalarning o'zi. Va oxirgi so'zlari: "Yugurishni to'xtatishingiz mumkin, chunki siz allaqachon yetib kelgansiz. Siz hozir yaxshi kunlardasiz. Doim shunday bo'lgan. Doim shunday bo'ladi".

Qisqasi, butun nutq bitta savolga qaytadi — Weaverning o'zi aytganidek: "Hayot ko'plab murakkab qarorlar to'plami deb o'ylardim. Aslida faqat bitta qaror bor ekan: qaysi ovozga quloq solasiz?"

Yuqoridagi fikrimdan keyin Ulug’bek aka Standford Universiteti o’qituvchisi Graham Weaver leksiyasini yubordi. Ko’rib mazza qildim, olgan xulosalarimni shu yerda bo’lishmoqchiman.

Graham Weaver o’zi kim? Alpine Investors nomli private equity kompaniyasining asoschisi va 24 yildan beri Stanfordda dars beradigan o'qituvchi.

Ikki og’iz gap bilan aytadigan bo’lsam, muvaffaqiyatga erishish mumkin, lekin buning uchun o’zingizni qiynab, yillab umringizni ish uchun sarflash shart emas.

Asosiy muammo — "yetib borsam hammasi yaxshi bo'ladi" xatosi

Weaver o'z hayotidan misol keltiradi, maktabda universitetga kirish uchun, universitetda Wall Streetga yetish uchun shoshildi, keyin haftasiga 100 soat ishlab kompaniya ochdi. Muammo maqsadlarda ham, mehnatda ham emas edi — muammo shundaki, u o'zini o'zi yoqtirmasdi va doim "qachondir yetib boraman, o'shanda hammasi joyiga tushadi" deb yashardi.

Keyin eng qiziq joyi, kompaniyasi birinchi katta daromadini olganda, pul hisobiga tushdi-yu... hech narsa o'zgarmadi. Olti oy ichida u butunlay yo'qolgandek his qildi o'zini, doim charchagan, ba'zan ofis eshigini yopib sababsiz yig'lardi. Ma'lum bo'ldiki, u shuncha yil biror narsaga qarab yugurmagan — u "sen yetarli emassan" degan ichki ovozdan qochib yurgan ekan.

Uning eng kuchli gapi "Ichki qadr-qimmatni tashqi yutuqlar orqali izlash — chanqoqni sho'r suv bilan qondirishga o'xshaydi: faqat chanqog'ingni kuchaytiradi".

Biz doim ikkita o'yin o'ynaymiz, tashqi o'yin (ish, pul, unvonlar) va ichki o'yin (o'zingiz bilan munosabatingiz). Hayot — tashqi maydonda o'ynaladigan ichki o'yin. Metakognitsiya degani — o'z fikrlaringiz haqida fikrlash. Bu meditatsiya, kundalik yozish, terapiya yoki shunchaki o'z o'ylaringiz bilan yolg'iz qolish orqali rivojlanadigan "muskul". Shu asosda u 3 ta amaliyot taklif qiladi.

1-amaliyot: "Murabbiyni ishdan bo'shating" (Fire the Coach)

Bu ichingizdagi tanqidchi ovoz haqida. Weaver metafora keltiradi: tasavvur qiling, bolalar beysbol o'yinida murabbiy 8 yashar bolaga "Yaxshi o'ynasang qadring bor, o'ynamasang — yo'q" deydi, va bola bu so'zlarni o'z hayot dasturiga aylantirib oladi. Ko'pchiligimiz o'zimizga xuddi shunday gapiramiz.

Ko'pchilik "o'zimga qattiqqo'lligim — motivatsiyam manbai" deb o'ylaydi. Lekin Weaver kompaniyasi eng katta zararini ko'rganda ichki ovozi uni faqat haqorat qilganini payqadi: "bu ichki murabbiy hech qachon g'oya, maslahat yoki yechim bermas ekan — u faqat bitta narsani ifodalar ekan: qo'rquvni. Yetarli emaslik qo'rquvi, muvaffaqiyatsizlik qo'rquvi". Va bu ovoz boshingizda qolib ketmaydi: u oilangizga qanday munosabatda bo'lishingizga, jamoangizga qanday ta'sir qilishingizga o'tadi. O'zingiz bilan munosabatingizdan yaxshiroq munosabatni boshqa hech kim bilan qura olmaysiz.

2-amaliyot: "Mixlarni sug'urib oling" (Pull Out Your Nails)

Bu mashhur "It's not about the nail" videosiga asoslangan metafora: ayol bosh og'rig'idan azob chekayapti, lekin peshonasida haqiqiy mix turibdi — u esa mixdan boshqa hamma narsa haqida gapiradi. "Mix" — bu energiyangizni so'rib olayotgan ish, hayotingizga zarar yetkazayotgan odat yoki muddati tugagan munosabat bo'lishi mumkin. Kechasi soat 2 da o'ylanib yotadigan narsangiz. Uni sug'urib olmasligimizning sababi doim bir xil: og'riqli!

Bu yerda u Olivia hikoyasini keltiradi: u to'ydan oldin yigitining ichkilikbozligini ko'rib, ichki sezgisi "bu munosabat noto'g'ri" deb ogohlantirgan, lekin taklifnomalar tarqatilgan, pullar to'langan edi — u ichki ovozini e'tiborsiz qoldirib turmushga chiqdi. Bugun o'sha 25 yoshli qiz 62 yoshda va o'sha nikoh — uning mixi — hayotining 37 yilini olib qo'ydi.

Mixni sug'urish jarayoni 3 bosqichdan iborat:

1) Mixingizni yashirin soyadan olib chiqing — uni tan oling va u haqda gapira boshlang.
2) Jamoa tuzing — do'stlar yoki terapevt bo'lsin, yolg'iz kurashmang.
3) Sug'urishga qat'iy qaror qiling — hayotingiz avval yomonlashishini bilsangiz ham.

TAF ga tayyorgarlik!

Kelajak fintech ilovasi qanday bo'lishi kerak? payme.uz uchun konsept dizaynimiz

Payme yaqinda o'z ilovasini yangiladi — bu O'zbekiston fintech bozori uchun muhim qadam. Biz esa UI/UX studiya sifatida o'zimizga savol berdik: agar bugun emas, balki 2-3 yil oldinga qarab dizayn qilsak, fintech interfeysi qanday ko'rinishda bo'lardi?

Natijada Payme uchun ushbu konsept dizaynni yaratdik. Bu rasmiy loyiha emas — bu bizning kelajak haqidagi professional qarashimiz.

Konseptda nimalarga tayandik:

Ma'lumotni his qilish, o'qish emas. Xalqaro UX tadqiqotlari shuni ko'rsatadiki, foydalanuvchilar raqamlar jadvalini emas, vizual ma'lumotni bir necha barobar tezroq qabul qiladi. Shuning uchun byudjet holati, xarajatlar dinamikasi va maqsadlar — barchasi grafik va widget ko'rinishida, bir qarashda tushunarli qilib qurildi.

Personalizatsiya — endi qo'shimcha emas, standart. Dunyodagi yetakchi fintech mahsulotlari (Revolut, Monzo, Cash App) tajribasi shuni tasdiqlaydi: foydalanuvchi o'z moliyaviy manzarasini o'zi xohlagancha ko'ra olishi kerak. Konseptimizda dashboard to'liq moslashuvchan widgetlar tizimiga qurilgan.
Dark mode va ambient muhit. So'rovlarga ko'ra, foydalanuvchilarning katta qismi ilovalarda qorong'u rejimni afzal ko'radi — bu nafaqat estetika, balki ko'z charchashini kamaytiradigan va OLED ekranlarda quvvat tejaydigan amaliy yechim. Biz buni shunchaki "qora fon" emas, chuqurlik va shaffoflik qatlamlari bilan ishlaydigan yaxlit vizual til sifatida qurdik.

Ishonch — moliyaviy dizaynning asosi. PwC tadqiqotiga ko'ra, foydalanuvchilarning uchdan bir qismi bitta yomon tajribadan keyin brenddan voz kechadi. Fintech'da bu ko'rsatkich yanada keskin. Shuning uchun har bir ekranda ierarxiya aniq: asosiy raqam — diqqat markazida, ikkinchi darajali ma'lumot — xalaqit bermaydi.

Bizning pozitsiyamiz oddiy: O'zbekiston fintech mahsulotlari dunyo darajasida raqobatlasha oladi — buning uchun mahalliy kontekstni chuqur tushunish va xalqaro dizayn standartlarini birlashtirish kifoya.

Payme jamoasiga esa yangilanish bilan muvaffaqiyat tilaymiz — kuchli mahsulotlar bozorni oldinga siljitadi.

Barcha case'larimiz bilan tanishing: https://www.fido.studio/cases

#FidoStudio #ConceptDesign #Fintech #UIUX #Payme #Uzbekistan #ProductDesign #DesignVision

Alifbodagi o'zgarishlar bizga rostan ham arzonga tushadimi?

Qisqa tanaffusdan keyin postlarni davom ettirmoqchiman endi. Bugun alifbodagi o'zgarishlarning texnik qiyinchiliklari va oqibatlari haqida bu tredni yozishni joiz topdim. Kelinglar alifbodagi o'zgarishlarining kelajakdagi ta'sirini texnologiyalar qanday ishlashi nuqtai nazaridan ko'rib chiqamiz.


1. Katta til modellari. Hozirgi zamonaviy til modellari til qoidalarini inson belgilab bergan bir varoq qoida bilan emas, qayta-qayta takrorlangan kuzatuvlarga asoslanib oʻrganadi. 30 yillik oʻzbek raqamli matn boyligi "shahar" soʻzini 100 million marta, "şahar" ni esa 1 million marta ko'radi. Katta til modellari kelajakda yangi alifboga oson moslashishi uchun dastlab mavjud UzNet toʻliqligicha oʻgirilishi kerak. Bu degani har bitta mavjud web sahifa, pdf, epub va hk. formatdagi fayllar oʻgirib chiqilishi kerak. Buni tekinga hech kim qilmaydi.

2. Qidiruv tizimlari va indekslar. Google kabi qidiruv tizimlari vaqt davomidagi oʻxshash matn, savol va unga javob beruvchi matnlar mavjud sahifalarni oʻrganadi. Algoritmlar 20 yillik axborotlar va foydalanuvchilarning qayta-qayta ishlatishi orqali oʻrganilgan tamoyillarga asoslanadi. Shunchaki bitta harfni boshqasiga o'zgartirib qoʻyish bu algoritmlar uchun shok hosil qiladi. "Sh" harfi "ş" ning muqobili ekanini bu algoritmlar oʻzidan-oʻzi aniqlay olmaydi. "ch"ning haqiqiy muqobili ĉ, ȼ yoki ç boʻlsachi? Kim bilsin.

3. Muvofiqlashtirish qoidalari. Bu degani - oddiy tilda aytganda bitta shakldan ikkinchisiga maʼlum qoidalar orqali oʻgirish desa bo'ladi. Masalan "Shuhrat" ismli shaxsning maʼlumotlar bazasidagi jadvallardagi qatorlari aniq-tiniq qilib Şuhrat'ga oʻgirilishi unchalik ham oddiy ish emas. Tajribali injenerlar entity resolution, regex va validatsiyalarning qanchalik murakkab ekanini, oʻzgarishlarni bittalab tekshirib chiqishdek ishning hajmi, va ishlar chatoq ketib qolsa uni orqaga qaytarishning qiyinchiliklarini yaxshi tushunishadi. Ayni yuqoridagi oʻzgarishning "backward compatible" qilish, yaʼni har bitta xato ketgan ismni hozirgi lotin qoidalariga qaytara olishini oldindan kafolatlash - bu murakkab va mavhumligi koʻp savol.

4. Annotatsiyalar. Lugʻatlar, glossariylar, audio maʼlumotlarning matnga oʻgirilgan shakllari, har biri ichki tizimlarda qayta oʻgirib chiqilishi kerak. Bu dasturchilar yoki kompyuter savodxonligi bor, malakali inson uchun iloji bor narsa, lekin bunga vaqt va kuch sarflash zarurmi? Deylik, chop etish bilan shugʻullanuvchi korxonalar bunday transformatsiyaga hamma narsani choʻntagidan qilishga majbur. 800 milliard soʻmdan ularga hech kim hech narsa bermayapti, tushunishimcha.

5. Parallellik muammolari. Ispan va nemis tillari xuddi taklif qilinayotgan tildek, klaviaturaga toʻliq moslashmagan belgilardan foydalanishadi. Lekin Müller Mueller, José esa Jose deb yozib ketiladi, oqibatda yillar oʻtib shunchaki qulay uslub ham qoidaga aylanib qoladi. Bugun nemislar Schroeder deb yozib oʻtib ketaveradi, bunga hech kim qarshilik qilmaydi, dasturlar va algoritmlar buni tushunishi uchun koʻp vaqt ketadi. Ular bu yozuv qoidalarini internetda matnli maʼlumotlar koʻpayishidan oldin kiritishgan. Bugun orqaga qaytish birdek qiyin ish.

6. Xorijiy tizimlar bilan xoslik va moslik. Oʻzbek tilida otasining ismi "oʻgʻli" deb yoziladi, bilamiz. Xorijda hujjatlar bilan ishlaganda buni ogli yoki ugli deb yozishga majburmiz. Bu mavjud muammo. Endi buning ustiga sh va ch qoʻshiladi. Avtomatik tizimlar buni s va c deb kiritadi. Qoʻpol misol: "Coriyev Sokir Samsod ugli"
Xuddi shularni tep-tekis lotinchada sh va ch deb yozish talaffuzda ham, yozish qoidalarida ham intuitiv. Ingliz tilida chapter, shallow yoki chamber soʻzlarini talaffuz qilish qoidalari aniq.

Yozsak narsa koʻp. Bu texnologik nuqtai nazardan juda yomon burilish bo'ladi. Asosiysi, bunaqa oʻzgarishlar IT olamida ham har doim uchramaydi. Bunday tajribaning boʻlishi ham IT hamjamiyati tomonidan yuqori baholanmaydi. Bizdan boshqa hech kim bunday muammo yaratib, uni yechib o'tirgan joyi yo'q.

Webflow endi O'zbekiston to'lov tizimlari bilan ishlaydi!

FidoStudio — Webflow rasmiy hamkori sifatida muhim bir bosqichni amalga oshirdik: Click va Payme to'lov tizimlarini Webflow platformasiga muvaffaqiyatli integratsiya qildik.

Bu nimani anglatadi?

Endi Webflow orqali quyidagilarni ishlab chiqish mumkin: Onlayn do'konlar, pullik tadbirlar uchun saytlar, onlayn kurslar platformalari, to'lovni qabul qiladigan istalgan turdagi veb-sayt

— barchasi tez, moslashuvchan va professional dizaynda.

Ushbu integratsiyaning birinchi amaliy natijasi — Marinno loyihasida ishga tushirildi: 🔗 marinnoshashlik.uz

Endi mijozlarimiz Webflow'ning zamonaviy imkoniyatlaridan foydalangan holda, mahalliy to'lov tizimlari orqali xavfsiz va qulay tarzda onlayn savdo qilish imkoniyatiga ega.



Loyihangiz uchun to'lov tizimli veb-sayt kerakmi? Yozing — g'oyangizni birgalikda hayotga tatbiq qilamiz.

#Webflow #FidoStudio #Click #Payme #WebDevelopment #Uzbekistan #Fintech #NoCode #Ecommerce

2-taym juda shiddatli o’yin bo’ldi, O’zbekiston jamoasi kuchli jamoaga qarshi yaxshi o’yin ko’rsatdi, ajoyib tajriba bo’ldi. Kolumbiya jamoasi esa haqiqiy tajriba, kuchli o’yinchilar qaltis vaziyatda o’zini ko’rsatishini ko’rsatdi.

Istanbul, havo doimgidan yaxshi.