اعدام‌لا یاریم قالان آرزولار
ساعات ایگیرمی اوچ،
بیر گئجه گوندوزون بیتمه‌سینه بیر ساعات قالیر.
عسگر او گونون دفترینی قاپادیر و ساباحی آنلادیر دوستاقلارا:
«حسن، علی، احمد،
یارین محکمه‌یه گؤتوروله‌جک.
رحمت باشقا شهره گؤنده‌ریله‌جک.
صمد اؤز شهرلری‌نین دوستاغینا گئری دؤنه‌جک.
بو دمیر قاپی مهدی‌نین اوزونه آچیلاجاق،
و ایسماییل.. گونشی بیر داها گؤرمه‌یه‌جک.»
گؤزلری دونور ایسماییلین
و اونون گؤزونه گؤرونمک ایسته‌مه‌ین یاخین دوستلاری،
بیر ساعات توالت‌ده قالیر.
دونوق سسله تاپشیریر،
اؤزوندن نئچه گون سونرا آسیلاجاق دوستونا،
یاریم قالان آرزولارینی.
سحر چاغی گونش اویانمامیش،
بیر گنجین یاشام گونشی،
اوشاقلیقدا اوزاق ساندیغیم یاخین داغلارین آردیندا باتیر.
دمیر قاپی آچیلیر.
باشقا دوستاغا و سورگونه گئدنلردن سونرا،
بیری اؤزگورلویه دوغرو گئدیر.
و اوز- گؤزونو دیدمیش قادین جسدینی آلماغا گلیر.
یئنه قاپی آچیلیر.
باشقا عسگر گلیر،
و گؤره‌وی بیتمیش عسگر دفتری اونا وئریب گئدیر.
ندن یورولمور بو قاپی؟
اوسانمیر بو دفتر؟
اوفانمیر بو کندیر؟
و تبریز دوستاغی اؤنونده قوروموش مئیدان چایی،
ندن دولمور بو قدر گؤز یاشیلا؟
----------
@ibrahimsavalan
Post #3727
1.23K