هم خزر دریاسی‌نین زیست محیطی جلسه‌سی و هم مشترک‌المنافع اؤلکه‌لرین رهبرلر جلسه‌سی ترکمنستاندا کئچیریلیر و پزشکیان، پوتین، پاشینیان، الهام علی‌یئو و بو منطقه‌نین بیر چوخ رهبرلری اوردا حاضر اولوب‌لار. اونلارین آراسیندا جناب پاشینیان بیزیم قدیم دوشمن‌یمیزدی کی ایندی دوستلوغا دوغرو آددیملار آتیر. کئشکه دوستلاریمیز چوخالسین، دوشمنلریمیزین آزالسین کی بیر دوشمن چوخ و یوز دوست آزدیر و یقین کی دوست قازانماق دا، راحات ایش دئییل‌دیر.
پاشینیان ترکمنستاندا سحر ساعات بئش‌یاریم‌دا اویانیب و شهرین خیاوانلاریندا چرخ سوروب و سو فواره‌سی کناریندا اورک علامتی گؤستریب، ویدیو پایلاشیب‌دیر. ویدیودا سسی گلن موسیقی آذربایجانلی زینب حسنی‌نین «آرام آرام» ماهنی‌سی‌دی و بو ارمنستان مخالفت پارتیاسی‌نی راحات‌سیز ائدیبدیر. بیر سورو قانماز الینده گرفتار اولان پاشینیان، تئز آچیقلاما وئریب کی ویدیودا ائشیدیلن موسیقی، اورداکی فواره‌لرین ریتم‌ینده پخش اولوردو و ائله منی ماراقلاندیران مسئله ده، او ساعات اوردا موزیکال فواره‌نین ایشله‌مه‌سی ایدی.
منجه پاشینیان گئری اوتورماق عوضینده، باشقا بیر ویدیو دا آیریلیق ماهنی‌سی‌نی پایلاشسایدی، داها اویغون جاواب اولاردی. آیریلیق ماهنی‌سی‌نین شعری فرهاد ابراهیمی و آهنگی علی سلیمی‌دن‌دی و او ماهنی‌نی ایلک دفعه، علی سلیمی‌نین خانیمی ارمنی وارتوش خانیم ایفا ائدیب، سونرا رشید بهبودوف اونو دونیایا یاییبدیر. ارمنی‌لر داشناک بلاسیندان اؤنجه، اؤز دیللری کناریندا تورک دیلینی ده اؤیرنیب و بو دیلین فرهنگی محصوللاریندان فایدالانیب، تویلارینا آشیق آپاراردیلار. اونلاردان حؤرمتلی آساطور صفریان آذربایجان ارکسترینه خدمت‌لر ائدیبدیر. هله ۱۸جی عصره قدر، بعضی ارمنی هنرمندلری تورک دیلینده ده اثرلر یاراتمیشلار کی ارمنی ادبیات تاریخینده، بؤیوک یارادیجی «سایات نووا»نی او آخیم‌ین سونونجو آدامی معرفی ائدیرلر.
البته سایات نووانین کیملیگینده مباحثه وار و بعضی‌لری اونو مسیحی تورک تقدیم ائدیر و سایات نووانین کتابی ۱۹۵۴ ده پروفسور میرعلی سیدوف طرفیندن چاپ اولوبدور. قاففاز خالقلاری‌نین قارداشلیق نغمه‌کاری عنوانی‌نی قازانمیش سایات نووا، اثرلرینین چوخونو تورکجه و بیر پارچالارینی دا ارمنی و گورجو دیلینده یارادیب‌دیر و اونون ارمنی موسیقی‌سینده اونودولماز ایزلری واردیر. آما ایندی بعضی‌لری، یالنیز بیر ماهنی‌نی، اؤزو ده بو قدر گؤزل بیر ماهنی‌نی تحمل ائتمیرلر.
----------
@ibrahimsavalan
Post #3736
605