Қаҳрамонии ҷавонмардони тоҷик дар дили оташи Стерлимитак
 
Дар шаҳри Стерлитамаки Ҷумҳурии Бошқирдистон, ки ин рӯзҳо баҳори тиллоии худро таҷлил менамояд, як ҳодисаи фаромӯшнашавандае рух дод, ки бори дигар ҷасорату мардонагии фарзандони Тоҷикистонро ба ҷаҳон нишон дод.
 
Тибқи иттилои расмӣ, дар моҳи сентябри соли ҷорӣ дар Маркази фурӯши «Солничный»-и ин шаҳр оташ сар зад. Оташ мисли аждаҳои хашмгин тамоми фазоро фаро гирифт ва мардумро ба ваҳшат овард. Дар он лаҳзаҳои даҳшатбор, вақте ки сокинону меҳмонон ҳаросон ба ҳар тараф мегурехтанд ва шахсони дорои имконияташон маҳдуд дар домони марг гирифтор шуда буданд, садои фарёди духтароне, ки «наҷот диҳед, хоҳиш мекунам!» гӯён ба осмон мерасид, дили ҳамаро ба ларза меовард.
 
Дар ин миёни оташу дуд, ду шаҳрванди Тоҷикистон —Маликов Хисравшоҳ Қудратуллоевич ва Ҳасанов Зоҳиршо Раҳмоншоевич, ки пас аз як рӯзи кори пурмашаққат барои харид ба фурӯшгоҳ омада буданд, мисли ситораҳои дурахшон дар торикии шаб пайдо шуданд. Онҳо садои фарёдро шунида, лаҳзае ҳам тараддуд накарданд ва бо дили пур аз ҷасорат ба сӯи хатар шитофтанд.
 
Қаҳрамони асосӣ, Хисравшоҳ Қудратуллоевич, бо чашмони тезбин ба атроф нигариста, мардеро дид, ки дар даст зинапояи думетрӣ дошт ва аз ронандаи автомобили боркаш хоҳиш мекард, то воситаи нақлиётро ба девори бино наздик кунад. Ӯ мисли парандае, ки болҳои худро мекушояд, зинапояро дар болои мошин гузошта, ҷони худро дар кафи даст гирифт ва бо дастонаш тахминан ду метри дигар дар девори фурӯшгоҳ ҷаҳид. Вай тавассути тирезаҳо ба ошёнаи сеюми маркази фурӯш баромада, ду нафар сокинони маҳаллиро аз чанголи марг ва даруни оташи сӯзон наҷот дод.
 
То расидани кормандони оташфишонӣ, бо далериву шуҷоати ин ду ҷавонмарди тоҷик, сокинон аз хатар наҷот ёфтанд. Ин амали шуҷононаи онҳо на танҳо ҷонҳоро наҷот дод, балки мояи ифтихор ва сарфарозии ҳар як тоҷику тоҷикистонӣ гардид. Сокинони маҳаллӣ имрӯз ҳам бо эҳтиром ба ин қаҳрамонон менигаранд ва номи онҳоро ҳамчун рамзи ҷавонмардӣ дар дилҳо нигоҳ медоранд. Ҷавонмардии тоҷикон бо сипоснома за ҷониби роҳбарияти шаҳри мазкур қадрдонӣ карда шудааст.

📱 Обуна шавед — Ҳамдастӣ
📱Ба Тик Токи мо обуна шавед