"Помир Энерҷӣ ва "Де Афғонистон "Брешна Ширкат" ҳамкориро дар таъмини нерӯи барқи ноҳияҳои наздисарҳадии Бадахшони Афғонистон идома медиҳанд

Дар шаҳри Душанбе байни Ширкати «Помир Энерҷӣ» ва Ширкати барқии Афғонистон «Брешна Ширкат» (DABS) тағйирот ба шартнома оид ба интиқоли нерӯи барқ ба ноҳияҳои наздисарҳадии вилояти Бадахшони Ҷумҳурии Исломии Афғонистон ба имзо расид. Ҳуҷҷатро аз ҷониби «Брешна Ширкат» Раиси иҷроияи он Алҳоҷ Мулло Абдулҳақ Ҳамкор ва аз ҷониби «Помир Энерҷӣ» Директори генералии ширкат Раим Амрихон имзо карданд. Тағйироти мазкур таъминоти нерӯи барқро ба ноҳияҳои наздисарҳадие, ки ҳоло аз шабакаҳои «Помир Энерҷӣ» барқ мегиранд, идома медиҳад.

Тавре маълум аст, Ширкати «Помир Энерҷӣ» дар баробари муштариёни ВМКБ ҳамчунин сокинони ноҳияҳои наздисарҳадии вилояти Бадахшони Афғонистон, яъне Моҳи Май, Нусай, Шуғнон ва Ишкошимро бо нерӯи барқ таъмин менамояд, ки 6 900 муштариро дар бар мегирад.

Ҷонибҳо инчунин розӣ шуданд, ки барқикунонии ноҳияҳои наздисарҳадиро идома диҳанд ва муҳимтар аз ҳама содироти нерӯи барқро аз Тоҷикистон тавассути шабакаҳои «Помир Энерҷӣ» ба вилояти Бадахшони Афғонистон вусъат бахшанд. Барои ин мақсад Ширкати «Помир Энерҷӣ» дар ҳудуди ҷамоати Қозидеҳи ноҳияи Ишкошими ВМКБ зеристгоҳи 110 кВ-ро сохта, ба истифода додааст. Ин зеристгоҳ имкон медиҳад, ки нерӯи барқи изофӣ тавассути хатҳои интиқоли барқи 110 кВ ба Афғонистон содир карда шавад.

Дар навбати худ, «Брешна Ширкат» омодагии худро барои оғози сохтмони хатҳои интиқоли барқ дар қаламрави Афғонистон иброз намуд. Ҳангоми мулоқот ҷонибҳо дар бораи кашидани хатти интиқоли барқи 110 кВ то маркази вилоят, шаҳри Файзобод, низ табодули назар карданд. Амалисозии ин нақшаҳо имкон медиҳад, ки шумораи истеъмолкунандагони нерӯи барқ дар Бадахшони Афғонистон, аз ҷумла дар шаҳрҳои Файзобод ва Баҳорак, афзоиш ёбад. Ҷузъиёти ҳамкориҳои минбаъда дар сатҳи техникии ҳарду ширкат баррасӣ карда мешаванд.

📱 Обуна шавед — Ҳамдастӣ
📱Ба Тик Токи мо обуна шавед