Рақобат қўмитаси электрон савдо бўйича мурожаатлар статистикасини эълон қилди

Йил бошидан буён Рақобат қўмитасига электрон савдо билан боғлиқ 1 230 та мурожаат келиб тушган. Уларнинг 446 таси ёки 36,2 фоизи Uzum Market билан боғлиқ.

Бунда 36,2 фоиз — Uzum Market харидорларининг норози қисми эмас, балки Қўмитага электрон савдо бўйича келиб тушган жами мурожаатлар орасидаги улушдир. Кўрсаткични баҳолашда платформанинг фаолият кўламини ҳам ҳисобга олиш муҳим.

Uzum’нинг 2025 йил якунлари бўйича эълон қилинган маълумотларига кўра, компаниянинг электрон савдо хизматларида буюртмалар сони 34 миллиондан ошган. Шу нуқтаи назардан, Қўмитага келиб тушган мурожаатлар буюртмалар умумий сонининг мингдан бир фоизларини ташкил этади.

Қўмита маълумотига кўра, 704 та мурожаат бўйича истеъмолчилар ҳуқуқлари тикланган. Шу билан бирга, юзага келадиган масалаларнинг катта қисми маркетплейснинг қўллаб-қувватлаш хизмати орқали ҳал этилади.

Uzum’да, шунингдек, электрон савдода шаффоф қоидаларни ривожлантириш бўйича Қўмита фаолиятини қўллаб-қувватлашларини таъкидлашди. Компанияда қайд этилишича, харидорларнинг фикр-мулоҳазалари такомиллаштириш талаб этиладиган жараёнларни аниқлашга ёрдам беради.

Бугунги кунда Uzum Market тармоғи мамлакатнинг 700 дан ортиқ аҳоли пунктида 2 000 дан зиёд буюртма топшириш пунктларини қамраб олган. Компания маълум қилишича, платформадаги товар позициялари сони эса 200 миллиондан ошади.

Шу сабабли маркетплейслар бўйича мурожаатлар статистикасини баҳолашда нафақат уларнинг сони, балки платформанинг кўлами, буюртмалар ҳажми ва истеъмолчилар мурожаатларининг қандай ҳал этилаётганини ҳам ҳисобга олиш муҳим.