Buxoro viloyati bojxona boshqarmasi tomonidan tadbirkorlarning muammolarini joyida o‘rganishga qaratilgan ochiq muloqotlar davom etmoqda
Navbatdagi uchrashuv G‘ijduvon tumanida faoliyat yuritayotgan tadbirkorlar ishtirokida bo‘lib o‘tdi. Unda boshqarma boshlig‘i B.Muratov tadbirkorlarning bojxona sohasiga oid murojaatlari, taklif va muammolarini tinglab, ularni hal etish yuzasidan zarur tavsiyalar berdi.
Muloqot davomida “Parvoz Xumo Ravnaq Trans” MCHJ vakillari eksport yuklarining “Xavfni boshqarish tizimi” orqali ayrim hollarda qo‘shimcha nazorat yo‘laklariga yo‘naltirilishi natijasida rasmiylashtiruv jarayoni biroz vaqt olayotganini ma’lum qildilar. Mutaxassislar tizim to‘liq avtomatlashtirilgan bo‘lib, inson omilisiz ishlashini tushuntirib, korxonaga bojxona tartib-taomillaridan yanada qulay foydalanish uchun “Vakolatli iqtisodiy operator” (VIO) maqomini olish bo‘yicha tavsiyalar berdilar.
Shuningdek, uchrashuvda Oʻzbekiston Respublikasi Prezidentining 2026-yil 27-avgustdagi PF–174-son Farmoni bilan joriy etilgan yangi imtiyoz va yengilliklar, xususan, halol tadbirkorlarni qo‘llab-quvvatlash, bojxona rasmiylashtiruvini soddalashtirish hamda VIO maqomining afzalliklari haqida batafsil ma’lumot berildi.
Ta’kidlanganidek, VIO maqomiga ega korxonalar bojxona rasmiylashtiruvini ustuvor tartibda amalga oshirish, yuklarni minimal nazoratdan o‘tkazish hamda bojxona to‘lovlarini qulay shartlarda to‘lash imkoniyatlariga ega bo‘ladi.
Tadbir davomida “G‘ijduvon mashhurasi” MCHJ faoliyati misolida bojxona imtiyozlarining amaliy natijalari ham ko‘rsatib o‘tildi. Mazkur korxona tomonidan so‘nggi davrda 2,1 million AQSH dollari qiymatidagi xomashyo “Bojxona hududida qayta ishlash” rejimiga rasmiylashtirilib, tayyor mahsulotlar eksporti yo‘lga qo‘yilgan. Hozirda korxona tomonidan VIO maqomini olish bo‘yicha ariza topshirilgan.
Mutaxassislar fikricha, bojxona va tadbirkorlar o‘rtasidagi bunday ochiq muloqotlar eksport salohiyatini oshirish, biznes uchun yanada qulay sharoitlar yaratish hamda hudud iqtisodiy rivojiga xizmat qilmoqda.